Elşad Miri : "Buna görə Allahın qarşısında cavab verəcəklər"

Son günlərin ən qalmaqallı ilahiyyatçısı Elşad Miri Ölkə.az-a Təzə Pir məscidində keçirilən Aşura mərasimində insanların fotolarını çəkməsindən və bu hərəkətinə görə tənqid olunmasından danışıb. İlahiyyatçı bildirib ki, fotoları baş redaktoru olduğu jurnal üçün çəkib.

"Tənqid yeni bir şey deyil, o həmişə olub. Şəkil çəkməyimə gəlincə, onu jurnalım üçün çəkmişəm, baş redaktor şəkli nə üçün çəkə bilər ki?

O ki, qaldı mənim dediyim məsələlərlə bağlı haqqımda tənqidi, təhqiramiz müxtəlif ifadələr işlədilir və mən də bunun şahidiyəm. Bunun əlehinə də heç bir şey demirəm, çünki hər kəs öz səviyyəsini öz əxlaqını, öz dinə olan bağlılığını göstərmiş olur. Sadəcə olaraq mənim istədiyim odur ki, mənim dediklərimi iddia edə biləcək, fikirlərimin yanlış olduğunu ortaya qoya biləcək, dəlillərlə, sübutlarla çıxış edib fikirlərimin səhv olduğunu sübut edə bilsinlər. Şəkillərimi müxtəlif cür montajda da edə bilərlər, əlehimə müxtəlif fikirlər də danışa bilərlər, yəni bu təzə bir şey deyil. Hər zaman haqqı tələb edən insanlara müxtəlif adlar qoyub, ləkə yaxmaq istəyiblər. Bu həmişə olub və buna da biz Qurani Kərimdən öyrənirik. Hətta peyğəmbərlərimizin dövründə belə haqqı gətirib deyənlərə kafir, dəli deyiblər. Əgər bu cür insanlara qarşı belə sözlər istifadə edilibsə, təbii ki, bizə bunların deyilməsi normaldı. Təbii ki, bu insanlara xeyir gətirməz, çünki onlar qeybət edirlər, günah qazanırlar. Buna görə də Allaha cavab verəcəklər. Mən o insanlara demək istəyirəm ki, özlərini İmam Hüseynin sevgisi ilə ortaya çıxdığını iddia edirlərsə, İmam Hüseynin əxlaqına uyğun davransalar daha yaxşı olar. İmam Hüseyn belə, onun ölümünə səbəb olan insanları nə söymədi, nə də başqa cür hərəkət etmədi.

Bu gün baxıram ki, bəziləri sosial şəbəkələrdə "qəhrəmana" çevrilib, ortaya çıxıblar və müəyyən fikirlər səsləndirirlər. O fikirlərə görə, sadəcə təəssüflənirəm, amma heç bir zaman kefimi pozmuram və öz işimlə məşğulam, çünki haqqı insanlara çatdırarkən bilirdim ki, bu şeylər olacaq. Belə şeyləri isə təbii qarşılayıram, bilirəm ki, möhfumat və xurafat olan yerdə din olmur. Din olan yerdə də möhfumat və xurafat olmur".

Xatırladaq ki, Elşad Miri müsahibələrinin birində "Məhərrəmlik ayında toyla bağlı bir qadağa yoxdur" deməsi bəzi insanların, o cümlədən ilahiyyatçıların narazılığına səbəb olmuşdu.

Fatimə İbrahimova
Ölkə.az