Qaradağda qaz xəttində partlayış nəticəsində evlərə ziyan dəyib

Bakının Qaradağ rayonu ərazisində bu gün səhər saatlarında iki qaz xəttində baş vermiş partlayış nəticəsində başlayan yanğın davam edir.

Ölkə.Az-ın APA-ya istinadən verdiyi məlumata görə, “Massiv 3” adlanan yaşayış sahəsinin ərazisində baş verən güclü partlayış nəticəsində yaxınlıqda olan yaşayış evlərinin şüşələri sınıb, dam örtükləri qırılıb.

Partlayış baş verən ərazinin 300 metrliyində polis postu qurulub. Sakinlər və media nümayəndələri təhlükəsizlik məqsədiylə əraziyə buraxılmır.

Hazırda Fövqəladə Hallar Nazirliyinin Dövlət Yanğından Mühafizə Xidmətinin canlı qüvvəsi və texnikası yanğının qarşısını almaq üçün tədbirlər davam etdirir.

***

Partlayış baş verən ərazidə işləyənlər tərəfindən Ölkə.Az-ın redaksiyasına yeni video göndərilib.

Videonu təqdim edirik:

***

Səngəçaldakı qaz qovşağından çıxan magistral qaz xətlərindən birində partlayış baş verib.

Ölkə.Az xəbər verir ki, bu barədə SOCAR məlumat yayıb.

Qeyd olunub ki, xəsarət alan yoxdur.

Hazırda həmin xətt lokallaşdırılır, sistemə daxil olan təbii qaz dayandırılır və təmir işlərinə başlamaq üçün hazırlıq görülür.

***

Səngəçal qəsəbəsinin Yenikənd adlı ərazisində Azəriqazın Qaz ixracı idarəsinin kompressor stansiyasında 125 atmosfer təzyiqi olan qaz xəttində partlayış baş verib.

Ərazidə işləyənlərin Ölkə.Az-a verdiyi məlumata görə, hadisə boş ərazidə baş verib. Ölən və yaralanan yoxdur.

Mənbənin verdiyi məlumata görə, hadisə Əzim kəndinin ərazisində saat 10:00 radələrində baş verib. İşçilərin çay fasiləsi vaxtı olduğu üçün ərazidə heç kim olmayıb. Bütün işçilər ərazidən təxliyyə edilir.

Hadisə baş verən yerlə təzə tikilən terminalın arasında məsafə 500 metrdir.

Mənbəmiz hadisənin hansı səbəbdən baş verdiyini də bilmədiyini də əlavə edib.

Hadisə ilə bağlı məlumatlar əldə etdikcə diqqətinizə çatdıracağıq.

***

Fövqəladə Hallar Nazirliyinin mətbuat xidmətindən Ölkə.Az-a verilən məlumata görə, Bakı şəhəri, Qaradag rayonunda diametri 1000-1200 mm olan 2 ədəd qaz xəttində yanğınla nəticələnən partlayış baş vermişdir.

Dərhal Fövqəladə Hallar Nazirliyinin Dövlət Yanğından Mühafizə Xidmətinin qüvvə və vasitələri hadisə yerinə cəlb olunmuşdur.

Hadisə nəticəsində xəsarət alan olmamış, yanğının söndürülməsi işləri davam edir, yaşayış məntəqələri üçün təhlükə yoxdur.

***

Səngəçal qəsəbəsinin Yenikənd adlı ərazisində Azəriqazın Qaz ixracı idarəsinin kompressor stansiyasında 125 atmosfer təzyiqi olan qaz xəttinin partlaması nəticəsində partlayış baş verib.

Ölkə.Az xəbər verir ki, bu barədə hüquq müdafiəçisi Mirvari Qəhrəmanlı "Facebook" səhifəsində yazıb. Onun sözlərinə görə, hadisə nəticəsində güclü yanğın baş verib.

"Alov evlərə də sirayət edib. Xəsarət alanlar barədə araşdırma aparırıq".