Milli Antidopinq Agentliyinin rəhbəri kim olacaq?
Azərbaycanda yaradılacaq Milli Antidopinq Agentliyinin rəhbəri Şəfəq Hacıyeva olacaq.
Ölkə.Az Report-a istinadən xəbər verir ki, bunu gənclər və idman naziri Azad Rəhimov bu gün keçirilən mətbuat konfransında deyib.
Nazirin sözlərinə görə, 2017-ci ildə idmançılardan 400-ə qədər dopinq analizi götürmək nəzərdə tutulub:
“Bu gün dərman qəbul edib, 10 ildən sonra tapılsa, həmin idmançı öz medalını itirir. Amma Dünya Antidopinq Agentliyinin öz xətti var. Biz də hazır olmalıyıq. Qanun qəbul olundu. Milli Antidopinq Agentliyi qeydiyyatdan keçirildi və yanvarın ilk günlərindən fəaliyyətə başlayacaq. Agentliyin nəzdində 3 - terapevtik, apellyasiya fəaliyyət göstərəcək.
Üzümüzə gələn il 400-ə qədər dopinq analizi götürməyi düşünürük. Eyni sayda da İslam Oyunlarında olacaq. Bu da 800 edir və yüksək göstəricidir. Agentliyin rəhbəri Şəfəq Hacıyeva olacaq. Biz onu təklif etdik və qəbul etdi”.
Nazir yerli federasiyalarda oxşar adların olmasından söz açıb və Ağırlıqqaldırma Federasiyasında prezident dəyişikliyi ilə bağlı yayılan məlumatlara aydınlıq gətirib:
“Federasiya ictimai birliklərdir. Biz eyniadlı federasiyanın olmasına icazə vermirik. Belə olarsa, Ədliyyə Nazirliyində məsələ qaldırırıq.
Bu gün Ağırlıqqaldırma Federasiyasının prezidenti Cahangir Hacıyevdir. Azər Əliyev Milli Olimpiya Komitəsinin baş katibinin müavinidir. Təbii ki, o federasiya ilə də əlaqələrini pozmayıb”.
