Nizami Kino Mərkəzində "Naxox" filminin qala gecəsi keçirilib

Ölkə.az xəbər verir ki, 28 dekabr “Nizami” kino mərkəzində "Naxox" yerli komediyasının qala gecəsi keçirilib.

Filmin yaradıcı heyəti qırmızı xalça üzərindən keçərək media nümayəndələri ilə təəssüratlarını bölüşüblər. Fərda Amin bildirib ki, film üzərində ciddi iş gedib: “Çalışmışıq ki, “Naxox” “Xoxan”-dan gülməli olsun. İstəyirik ki, tamaşaçılara zövqlü və gülüş dolu anlar yaşadaq”.

Elməddin Cəfərov isə “Naxox”un fərqli iş olduğunu deyib: “Xoxan”dan fərqlidir. Hadisələr daha qorxuludur. Həm də komediya var. İnşallah, tamaşaçılar bəyənər”.

Daha sonra filmin kollektivi qonaqlarla birgə ekran işini izləyib. Nümayişdən sonra alqışların sədası altında səhnəyə çıxan səbəbkarlar çəkilişdə əziyyəti keçən hər kəsə minnətdarlıqlarını bildiriblər.

Qeyd edək ki, filmin ssenari müəllifləri - Ənvər Abbasov, Samid Ağayev, Elnur Hüseynov, Fərda Amin, Zaur Mirzəzadə, quruluşçu rejissoru Zaur Mirzəzadə, quruluşçu rəssamları Anar Hüseyn, Ceyhun Cəfərquliyev, Səbuhi Atababayev, bəstəkarı İslam Şirvani, quruluşçu operatoru Rafiq Hacıyev, prodüserlər Zaur Mirzəzadə, Orxan Mərdandır.

Filmdə baş rollarda Elməddin Cəfərov, Fərda Amin, Ağaxan Salmanlı, Abbas Qəhrəmanov, Fidan Axundova, Rüfət Nəzərli, Nigar İbrahimova oynayırlar.