ABŞ kəşfiyyatı Trampın obrazında vətən xaini yarada bilər

Obama admistirasiyası bir neçə gündən sonra hakimiyyəti təhvil verəcək.

Amma bu ərəfədə ABŞ Rusiyaya qarşı durmadan sanksiyalar verir, diplomatlarını ölkədən çıxardır.

Obama admistirasiyası rusiyalı 35 diplomatı ölkədən çıxarmaq barədə qərar verib. Bundan əlavə olaraq da, Rusiyaya qarşı sanksiyaların müddətini artırıb.

Buna cavab olaraq Rusiya prezidentinin mətbuat katibi Dmitri Peskov deyib ki, səlahiyyət müddətinin başa çatmasına üç həftə qalan hazırkı administrasiyanın bu cür hərəkətləri iki ölkənin münasibətləri üçün dağıdıcı, destruktiv xarakter daşıyır. Bu hərəkətlər tamamilə aqressiya nümayişidir.

Rusiya Dumasının xarici əlaqələr komitəsi sədrinin müavini Aleksey Çepa isə ABŞ-ın rusiyalı diplomatları ölkədən çıxarmasını hakimiyyəti təhvil verən adminstrasiyanın can verməsinə bənzədib.

ABŞ və Rusiya arasında baş verənlərlə bağlı politoloq Adıgözəl Məmmədov Ölkə.Az-a danışıb:

"Bu addımların əsas məqsədlərindən biri də kobud dildə desək Trampı əhilləşdirmək məqsədini güdür. Bununla da Trampa mesaj ötürülür ki, əgər sən ABŞ-ın oturuşmuş, ənənəvi siyasətindən kənara çıxsan, kiber hücumları gündəmə gətirərək səni impiçment edərik. Trampa başa salırlar ki, Rusiya yönümlü çıxışlarını dayandırmalıdır. Obama admistirasiyasının Rusiyaya qarşı həyata keçirdiyi siyasət həm də Trampı küncə sıxmaqdır. Tramp əgər axına qarşı çıxsa, onu çox ağır günlər gözləyir.

ABŞ rusiyalı 35 diplomatı ölkdən kənarlaşdırmaq qərarı aldı. Əgər Tramp tutduğu yoldan əl çəkməsə, Trampla o diplomatların əlaqələrini araşdırıb üzə çıxara bilərlər. Bununla da Trampın timsalında vətən xaini obrazı yarada bilərlər.

Tramp 35 diplomatın "persona non grata"sından sonra mövqeyini 180 dərəcə dəyişdi. Tramp bəyanat verdi ki, bu çox ciddi siqnaldır: "ABŞ xüsusi xidmət orqanlarının apardığı addımları dəstəkləyirəm və onlarla geniş fikir alış-verişi edəcəm".

Rusiyaya qarşı Obama admistirasiyasının atdığı addımlar Trampı cilovlamaq üçün nəzərdə tutulub. Tramp bundan sonra Rusiya ilə münasibətləri yaxşılaşdırmaq istəsə Obama adminstrasiyasının "səpdiyi bu minaları" təmizləməlidir. Bu isə çox vaxt alacaq".

Səxavət Məmməd
Ölkə.Az