“Dağlıq Qarabağ tarixi ayrı-ayrı kitablarla tədris olunur”

Yeni Azərbaycan Partiyasının (YAP) icra katibinin müavini, Milli Məclisin deputatı Siyavuş Novruzov Azərbaycandakı bir sıra rusdilli məktəblərdə Dağlıq Qarabağın tarixinin ayrıca dərs kimi tədris olunmasına etiraz edib.

Ölkə.Az-ın məlumatına görə, S.Novruzov Milli Məclisin bu gün keçirilən plenar iclasında çıxışı zamanı deyib ki, bəzi orta məktəblərdə rus dilli bölmələrin 8-ci sinifində Azəraybacan və Dağlıq Qarabağ tarixi ayrı-ayrı kitablarla tədris olunur:

“Məgər Dağlıq Qarabağ Azərbaycan tarixi deyil? Bununla bağlı mənə tarix müəllimləri tərəfindən dəfələrlə müraciətlər olub. Həm Yaqub müəllim, həm də İsa müəllimdən xahiş edirəm ki, bu məsələyə aydınlıq gətirilsin. Belə çıxır ki, İrəvanın, Naxçıvanın tarixi də ayrı keçirilməlidir? Bu hansı formada və nəyə uyğun şəkildə tədris olunur? Xüsusilə də bunun rus dilində olması məni narahat edir. Çünki bundan istənilən an istifadə edib, deyə bilərlər ki, Azərbaycanın özündə belə Dağlıq Qarabağın tarixi ayrı dərs kimi tədris olunur və sairə. Ona görə də xahiş edirəm ki, bununla bağlı araşdırma aparılsın”.

Spiker Oqtay Əsədov isə deputatın qaldırdığı məsələnin vacib olduğunu və araşdırılmasının lazım olduğunu bildirib.

Zaur Əziz
Ölkə.Az