Zahid Oruc: "Ermənistanın məqsədi Bakı ilə Moskvanı üz-üzə qoymaqdır"

Dünən ermənilər Azərbaycan və Ermənistan dövlət sərhəddində təxribat törədib.

Təxribat nəticəsində bir əsgərimiz şəhid olub, erməni tərəfinin isə bir neçə hərbçisi məhv edilib. Hadisədən sonra erməni mətbuatı Azərbaycanın dövlət sərhəddini pozduğunu iddia edərək Kollektiv Təhlükəsizlik və Müdafiə Təşkilatından (KTMT) məsələ ilə bağlı bəyanat verməsini tələb etməyə başladı. KTMT-nin bəyantı isə birmənalı qarşılanmadı. Xüsusən də bəyanatda "müstəqil Dağlıq Qarabağ respubilkası" ifadəsi Azərbaycan XİN-i bəyanat verməyə sövq etdi.

Hadisələrdən görünən odur ki, ermənilər planlı şəkildə iş görüb və iki dövlət arasında olan məsələyə KTMT-ni də cəlb etməyə çalışır.

Baş verən hadisələrlə bağlı millət vəkili Zahid Oruc fikirlərini Ölkə.Az-la bölüşüb:

"Dünən Ermənistan Azərbaycan dövlət sərhəddində baş verən təxribatın məhz qarşı tərəfdən törədildiyini sübut edənk 3 mühüm arqument var. Düşünürəm ki, bunlar çox əhəmiyyətlidir və Azərbaycan tərəfini qınamaq istəyənləri bu arqumentlərlə tamamilə tərki-silah etmək mümkündür.

Birincisi, son aylar ərzində erməni cəmiyyətində sülh tərəfdarları xeyli artmaqda idi. Xüsusilə də, Ermənistanın eks-prezident Levon Ter-Petrosyan Ermənistan Milli Konqresinin qurultayında tarixi bir çıxış etdi. O, devrilmə səbəbini vaxtilə getməli olduqları güzəştlərin 18 il sonra yenidən erməni xalqının qarşısında dayandığını vurğuladı. Bu yalnış siyasətin erməni dövlətçiliyini məhvə apardığını söylədi. Hətta belə bir fikir səsləndirdi ki, biz yad torpaqları verməsək öz ərazilərimizi də itirəcəyik. Belə olan təqdirdə cəmiyyətdə olan dəyişikliklər siyasi nəticələr doğura bilər."Ermənilər, baxın, Azərbaycann müharibə tərəfdarıdır"- mesajını cəmiyyətdə dərc etmək üçün Qarabağ bölgəsindən kənarda belə bir təxribata getdilər.

İkincisi, düşünürəm ki, Ermənistan hərbi meydanda heç zaman Azərbaycanla təkbətək üz-üzə qalmaq istəməyib. Bəzən beynəlxalq təşkilatlar, siyasi qrumlar, strukturlarla bərabər KTMT dövlətlərinin də onların tərəfindən iştirak edəcəyini hər zaman qeyd edirdilər. Bu amili Azərbaycan qarşısına qoyurdular. Aprel hadisələri bunu tam əksini göstərdi. Bəlli oldu ki, nəinki KTMT modeli işləmir və yaxud Azərbaycanın atdığı hər bir güllə həm də Minskə, Düşənbəyə, Astanaya, Moskavaya qarşıdır deyən Sərkisyanın mövqeyinin əleyhinə heç bir qırğız, qazax, rus bu müharibədə vahid səngərdə Azərbaycana qarşı döüyşmək istəmədiklərini göstərdilər. Bu onun işarəsi idi ki, Azərbaycanın Ermənistanla apardığı savaş heç bir halda Qazaxıstan, Belarus əleyhinə deyil. Bizim onlarla çözüləcək xüsusi bir problemimiz yoxdur. Belarus və Qazaxıstan açıq şəkildə Azərbaycanı müdafiə etdi. Ona görə də, ermənilər KTMT-nin iki iclasında müxtəlif təxribatlara əl atmağa çalışdılar. Ermənilər KTMT və Rusiyanı qurumdan çıxmaqla şantaj edirlər. Məhz sərhəddin digər bölgələrində bu cür təxribatı törətməklə bu dövlətlərin diqqətini cəlb etməyə çalışırdılar. Azərbaycanın məhz İrəvana təhlükə törətdiyi faktını ortalığa qoysunlar, Bardyuja tərəfindən verilən siyasi bəyanatı əldə etsinlər. Sözü gedən bir neçə reaksiyada yalnız Dağlıq Qarabağı müstəqil respubilka kimi ifadə etmək cinayətindən başqa tərəflərin bu təxribatı açıq şəkildə vurğulanmır. Erməni informasiya vasitələri guya KTMT-nin Azərbaycanı günahkar çıxardığını iddia edirlər. Əslində həqiqət belə deyil.

Üçüncü məsələ çox önəmlidir. Düşünürəm ki, Azərbaycan mətbuatında bu fikir vurğulanmayıb. Bilirsiniz ki, 5 ildən artıqdır ki, Suriyada davam edən müharibə nəhayət Türkiyə və Rusiyanın tarixi razılaşması mərhələsini yaşayır. Bu çox mühüm məsələdir. Təkcə ona görə yox ki, Yaxın Şərqdə, çox mühüm bir ölkədə tərəflər öz aralarında nəhayət fəaliyyətlərini razılaşdırmaq yönündə qərar veriblər. Türkiyə və Rusiya kimi mühüm dövlətlər bu prosesdə önəmli rol oynayırlar. Bu da müxtəlif dövlətləri narahat edir, o cümlədən Ermənistanı. Ermənilər çalışır ki, təkcə Qarabağ bölgəsini deyil, eyni zamanda sərhədyanı ərazilərdə də təhlükə törətsinlər və prosesə Rusiya müdaxilə etsin. Belə olacağı təqdirdə Azərbaycanla Türkiyə arasında strateji tərəfdaşlıq şurası yaradıldı və iki ölkənin hərbi müttəfiqlik barədə razılığı əldə edildi. Ermənilərin məqsədi isə odur ki, Türkiyə Suriyaya ordu yeritdiyi kimi, Azərbaycanı tək qoymayaraq Ermənistan sərhəddini pozsun. Bu zaman Rusiya məsələyə müdaxilə edəcək və iki dövlətin müttəfiqliyinə xələl gələcək. Belə demək mümkündürsə ermənilər tərəfindən bu cür məkirli, strateji siyasət yürüdülməkdədir.

Müharibənin lokal və ya geniş miqyaslı olmasının təhlükələri və itkiləri Ermənistanda olacaq. Əhalimiz erməni əhalisindən 3 dəfə, döyüş resuslarımz 10 dəfə, iqtisadi gücümüz 100 dəfə artıqdır. Belə olan təqdirdə 1 erməninin ölməsi 3-ə bərabərdir. Ermənilər çox yaxşı bilir ki, müharibə 90-cı illərin əvvəlindən fərqli olaraq onlara yalnız fəlakət gətirəcək. Hesab edirəm ki, Azərbaycan tərəfi prosesləri dəqiq təhlil edir və beynəlxalq qurumları bununla bağlı məlumatlandırmaqdadır. Əminəm ki, Bardyujanın o ifadəsinin KTMT-nin saytından çıxarılması və düzəldilməsi yönündə də bizim diplomatik korpus hərəkətə keçəcəkdir".

Səxavət Məmməd
Ölkə.Az