Şahzadə Diananın müəmmalı ölümü

Şahzadə Diana 1961-ci ildə anadan olub. O, 1981-ci ildə Britaniya taxtının varisi şahzadə Çarlz ilə ailə həyatı qurub. Dünya ictimaiyyətinin sevimlisinə çevrilmişdi və hamı onu ledi Di deyə çağırırdı. Diana yaxşı ailədən çıxmışdı və əla təhsil almışdı. 1982-ci və 1984-cü ildə Diana ana olur. Onun Uilyam və Henri adlı iki övladı dünyaya gəlir. 1992-ci ildə şahzadə ərinin Kamilla Parker adlı qadınla eşq macərası yaşadığını öyrənəndə ailə münasibətləri korlanmağa başlayır. Bu hadisədən sonra cütlük ayrı yaşamağa başlayır. 1996-cı ildə rəsmən boşanır. 1997-ci ilin 31 avqust tarixində 36 yaşlı Diana Paris şəhərində avtomobil qəzasında həlak olur. Bu faciə bir çox şayiə və dedi-qoduların yaranmasına səbəb olur.

Ölkə.Az bu gün oxucularına şahzadə Diananın ölümü ilə bağlı əsas versiyaları təqdim edəcək.

Tunel qəzası

Şahzadə Diananın ölümü bütün dünyanı sarsıtdı. Hadisə 31 avqust tarixində saat 00:32 radələrində Alma körpüsünün altındakı tuneldə baş verib. “Mercedes S-Class” markalı avtomobil sürətlə tunelin divarına çırpılıb. Toqquşma anında avtomobil 173 km/saat sürətlə hərəkət edib. Avtomobilin salonunda 4 nəfər olub: sürücü Anri Pol, mühafizəçi Trevor Ris-Conson, Diananın dostu Dodi-əl-Fayed və şahzadənin özü.

Anri Pol və Dodi əl-Fayed hadisə yerində can verdilər. Diananı xəstəxanaya çatdırsalar da, həkimlər onun həyatını xilas edə bilmədilər. Şahzadə yerli vaxtla 04:09 radələrində gözlərini əbədi olaraq yumdu. Qəzada sağ qalan yeganə şəxs Trevor Ris-Conson idi. O, çoxsaylı zədələr almışdı və bir neçə mürəkkəb cərrahiyyə əməliyyatı keçirdi. Amma mühafizəçi faciənin son dəqiqələri barədə heç nə danışa bilmədi, çünki heç nə xatırlamırdı.

Baş verən faciə bütün dünyaya təsir etdi. Bəzi insanlar Diananın guya ölümündən 10 ay əvvəl yazdığı məktubu ortaya çıxardılar. Məktuba əsasən, guya, şahzadə kimlərsə tərəfindən qətlə yetirilmək istəndiyini və avtomobil qəzası təşkil etdiyini yazırdı. Təbii ki, bunlar uydurma idi və bununla belə, məktuba inanan insanlar da az deyildi.

Avtomobilin qalıqları və rəsmi versiya

Fransa polisinin rəsmi versiyasına əsasən, avtomobilin sürücüsü sükan arxasında içkili olub. Onun qanının tərkibində spirtli içkinin miqdarı yol verilən miqdardan üç dəfə çox olub.

Vəziyyəti avtomobili təqib edən paparazzi fotoqraflar qəlizləşdirib. Anri Pol onlardan aralanmaq istəyib. Qəflətən paparazzilərin maşını “Mercedes”-in qabağına keçir və qəza vəziyyəti yaranır. Toqquşmadan yayınmaq istəyən Anri manevr etmək istəsə də, divara çırpılır.
Bu versiya kifayət qədər obyektiv və izahedicidir. Fransa polisinə inanmamaq üçün heç bir əsas da yoxdur. Çünki fransız polisi dünyada ən yaxşı və obyektiv təhqiqat aparan polis əməkdaşlarıdır.

Amma nəzərə almaq lazımdır ki, əgər şahzadə və onun tanışı Dodi əl-Fayed təhlükəsizlik kəmərlərini taxsaydılar, sağ qala bilərdilər. Zərbədən sonra avtomobilin ön hissəsi çox ciddi zərər çəksə də, cütlük əyləşən arxa oturacaqlar elə də xəsarət almamışdı. Avtomobilin dörd sərnişini heç biri təhlükəsizlik kəmərindən istifadə etməmişdi. Buna görə də 3 nəfər öldü və bir nəfər də möcüzə sayəsində sağ qaldı.

Dodi və atası

Dodi prodüser işləyirdi və onun 42 yaşı var idi. Dodi milyarder Məhəmməd əl-Fayedin oğlu idi. Məhəmməd əl-Fayed bəyan etdi ki, təhqiqat qeyri-obyektiv aparılıb. Bir çox fakt isə təhrif edilib. Qəza şəraitinə səbəb olan paparazzi Ceyms Andanson əslində Britaniya kəşfiyyatı M6-nın əməkdaşı olub. Sürücü Anri Pol sərxoş olmayıb. Səfərdən əvvəl o, böyük miqdarda psixotrop həb qəbul edib. Buna görə də təsadüfdən yox, planlaşdırılmış qətldən danışmaq lazımdır.

Bütün bunlar təbii ki, iddiadır. Amma nəzərə almaq lazımdır ki, Ceyms Andanson 2000-ci ildə dünyasını dəyişib. Onun yanmış cəsədini meşədə yanmış avtomobilində tapıblar. Hüquq-mühafizə orqanları bildirdilər ki, özünə qəsdin bütün motivləri bu hadisədə var. Bu mümkündür. Çünki paparazzilər həmişə insanların həyatını zəhərləyirlər. Sonra vicdanları sızıldayır və depressiya başlayır. Görünür, Ceyms də depressiyaya düşərək özünə qəsd edib. Amma Məhəmməd əl-Fayedin fikrinə görə, bunu da Britaniya kəşfiyyatı edib. Təbii ki, övladını itirmiş atanı başa düşmək mümkündür.

Təhlükəsizlik kameraları

Siyasi sifariş ittihamını irəli sürənlərin başqa faktı da var. Bu fakta əsasən, hansısa qəribə təsadüf nəticəsində ledi Dinin qaldığı “Rits” otelinin yanındakı müşahidə kameraları avtomobil tunelə girənə qədər işləməyib. Sensassiya həvəskarları bu hadisədən möhkəm yapışdılar. Onların fikrinə görə, M6 xəfiyyələri müşahidə kameralarını müvəqqəti olaraq sıradan çıxarmışdılar. Bu yolla xüsusi xidmət orqanları baş verən qətlin bütün sübutlarını ortadan qaldırıb.

Bəzi insanlar isə dəhşətli qəzaya görə Anri Polu günahkar bilirdilər. O, guya Britaniya xüsusi xidmət orqanlarının əməkdaşı idi və bu işə görə külli miqdarda pul alıb. Onun pencəyinin cibindən 2 min funt sterlinq tapılmışdı. Anrinin bank hesabında isə 100 min funt sterlinq var idi. Amma onun illik maaşı 25 min funt sterlinq idi.

Beləcə, şahzadənin ölümünə səbəb kimi əsasən beş versiya göstərilir:

Birinci versiya

Birinci versiyaya əsasən, şahzadə Diananın ölümündə paparazzilər günahkardır. Onlar şahzadənin avtomobilini motorollerlə təqib ediblər. Onlardan biri, avtomobilə mane olduğu üçün sürücü toqquşmadan yayınmaq istəsə də, beton divara çırpılıb. Amma şahid ifadələrinə əsasən, motorollerlər tunelə “Mercedes”dən bir neçə saniyə sonra girmişdilər və buna görə də qəzaya səbəb ola bilməzdilər. Vəkil Virciniya Bardenin sözlərinə əsasən, əslində fotoqrafların günahkar olduğunu sübut edən heç bir fakt yoxdur.

Müəmmalı avtomobil

İstintaq başqa versiya da irəli sürdü. Qəzaya səbəb tuneldə hərəkət edən başqa avtomobil olub. Divara çırpılan “Mercedes”-in yanında polis əməkdaşları “Fiat Uno” markalı avtomobilin qalıqlarına rast gəliblər. Şahid ifadələrinə əsasən, qəzadan bir neçə saniyə sonra ağ rəngli “Fiat Uno” ziqzaq “yazaraq” tuneldən çıxıb. Sürücü yola yox, güzgüdən arxaya baxır, elə bil ki, nəyisə diqqətdən qaçırmamağa çalışırdı.
Polis tərəfindən avtomobilin istehsal ili, xarakteristikası və rəngi müəyən edildi. Bununla belə, nə sürücünü, nə də avtomobili tapmaq mümkün olmadı.

Diananın ölümünün araşdırması ilə məşğul olan Frensis Jilleri yazırdı: “Ölkədə olan bu markalı bütün avtomobillər yoxlanıldı. Amma onlardan heç birində toqquşma izi yox idi. Ağ rəngli “Fiat Uno” yerin dibinə batmışdı. Qəza şahidləri onu görsələr də, ifadələrində müəyyən dəyişikliklər etməyə başladılar. Qəza zamanı hadisə yerində “Fiat Uno” markalı ağ avtomobilin olub-olmaması dəqiqləşdirilmədi”.

Maraqlıdır ki, bu avtomobil barədə versiya qəzadan iki həftə sonra üzə çıxmışdı.

Britaniya xüsusi xidmət orqanları

Bir müddət sonra qəzaya dair yeni versiyalar üzə çıxdı. Məsələn, bəzi mənbələrə əsasən, qara rəngli “Mercedes” tunelə girəndə çox parlaq işıq görünüb. İşıq o qədər parlaq idi ki, onu görənlərin hamısı bir neçə saniyə kor olmuşdu. Bir neçə saniyədən sonra isə gecənin sakitliyini əyləc və zərbə səsi pozdu. Britaniya xüsusi xidmət orqanı əməkdaşının mətbuata ötürdüyü məlumata əsasən, Dianaya qarşı sui-qəsd planı hazırlanmışdı və bu plan Yuqoslaviya prezidenti Slobodan Miloşevişə qarşı hazırlanmış planı xatırladırdı. Britaniya kəşfiyyatının planına əsasən Slobodan tuneldə güclü işıq şüası ilə kor edilməli idi.

Hadisədən bir neçə ay sonra Britaniya və Fransa qəzetləri Britaniya xüsusi xidmət orqanlarının sabiq əməkdaşı Riçard Tomplisonun bəyanatını dərc etdilər. Bəyanata əsasən, Alma tunelində xüsusi xidmət orqanlarının arsenalında olan ən müasir lazer silahından istifadə edilib. Bu bəyanatdan sonra mətbuat belə fikrə gəldi ki, “Fiat Uno” markalı maşının qalıqları qəzanı planlaşdıranlar tərəfindən qəsdən tunelə atılıb və hadisəni ört-basdır edərək avtomobil qəzası donu geyindiriblər. Uzun müddət məsələdə Britaniya xüsusi xidmət orqanları günahkar bilindi.

“Uğurlu” fotoqraf

Müəmmalı “Fiat”la bağlı başqa bir versiya da var. Mətbuatın versiyasına əsasən “Fiat Uno” markalı avtomobilin qalıqları qəsdən hadisə yerinə atılıb. Qəzanı planlaşdıranlar hadisəyə avtomobil qəzası donu geyindirmək istəyiblər. Mətbuatda dolaşan şayiəyə əsasən, xüsusi xidmət orqanı əməkdaşları həmin gecə şahzadənin avtomobilinin yanında ağ rəngli “Fiat” olacağını əvvəlcədən bilirdilər. Ağ avtomobil ilə Parisin ən məşhur və uğurlu paparazzi fotoqrafı Ceyms Andanson hərəkət edirdi. Mətbuatın yazdığına əsasən, xidmət orqanları fotoqrafın və avtomobilinin qəzaya səbəb olduğunu sübuta yetirə bilmədilər. Andanson həqiqətən də həmən gecə tuneldə olub. Onun bəzi həmkarlarının bildirdiyinə görə, Andanson 30 avqust 1997-ci il tarixində “Rits” otelinə maşınsız gəlib. O, nadir hallarda avtomobilsiz gəzərmiş. Andanson dəfələrlə əl-Fayed ailəsinin təhlükəsizlik xidməti tərəfindən gözə çarpıb. Onlar üçün Andansonun təkcə fotoqraf olmadığı məlum idi. Onun Britaniya xüsusi xidmət orqanlarının əməkdaşı olduğunu əl-Fayedin təhlükəsizlik xidməti üzə çıxarır. Amma Dodinin atası hansısa səbəbdən bu faktları istintaqa təhvil vermir. Ceyms Andanson bu faciədə təsadüfi adam deyil.

Andansonu tuneldə görüblər. Faciə yerində onun avtomobilinə oxşayan maşın da görüblər. Amma maşının nömrəsi başqa imiş. Yəqin ki, saxta dövlət nömrə nişanından istifadə edilib.

Qəzadan sonra Andanson tunelə insanlar yığışanda qəflətən yoxa çıxır. Gecə saat 04.00 radələrində o, Parisdən Korsikaya uçur.
Sonradan isə onun cəsədi yanmış halda meşədə öz avtomobilində tapılır.

Sərxoş sürücü

1999-cu ilin 5 iyul tarixində dünyanın bütün mətbuat orqanları istintaqın sensasion bəyanatını çap edirlər: Alma tunelində baş verən qəzada əsas günahkar sürücü Anri Pole olub. O, “Rits” otelinin mühafizə xidmətinin rəisi idi və qəzada həlak olmuşdu. Müstəntiqlər Anrini sərxoş halda sükan arxasına keçməkdə günahlandırırdılar. Deyilənə görə, qəzadan sonra 24 saat ərzində meyit üzərində aparılan ekspertiza güclü sərxoşluq faktını ortaya qoydu. Amma bu barədə məlumat 2 il sonra mətbuata ötürüldü.

İstintaq orqanlarının əməkdaşı olan Jak Myüles faciə yerinə ilk gələnlərdən idi və bəyan etdi ki, qan analizi Anrinin həqiqətən də sərxoş olduğunu sübut edib. Onun sözlərinə görə, “Rits” otelindən ayrılmadan əvvəl şahzadə Diana və Dodi əl-Fayed əsəbləşiblər.

Jurnalist Syu Raydın versiyası

Britaniyalı jurnalist Syu Raydın fikrinə görə, bütün dünyanı sürücünün günahkar olmasına inandırdılar. Eyni zamanda, günahın bir qismini “Mercedes”-i təqib edən paparazzilərin boynuna atdılar. Syu hadisə şahidləri, fransız və Britaniya kəşfiyyatının zabitləri, SAS əməkdaşları, Diana və Dodinin dostları ilə söhbət edib. O, Anrinin valideynlərindən də müsahibə götürüb. Valideynlər bildirib ki, Anri heç vaxt alkoqolik olmayıb. Ən uzağı bir şüşə pivə və ya “Ricard” içə bilərdi.

Şahzadənin Dodi ilə sevgi macərası cəmi 6 həftə davam edib. Diana sevgilisinə qiymətli hədiyyə verib və dostlarına zəng edərək Parisdən qayıdanda onları sürpriz gözlədiyini bildirib.

Dodi isə Dianaya hədiyyə etmək üçün Parisin ən yaxşı zərgərlərinə qiymətli zərgərlik məmulatı sifariş edib.

Diananın dostları şahzadənin hamilə olduğunu bildirib. Diananın ölümündən sonra onun gizli surətdə Londonun ən yaxşı xəstəxanalarından birinə gedərək hamiləliyi barədə məlumat aldığı üzə çıxıb.

Şahzadə müsəlman sevgilisi ilə Uilyam və Harrini də götürərək İngiltərədən gedəcəyini bildirmişdi. Dodi bu səbəbdən Kaliforniyada mülk də almışdı.

Məhəmməd əl-Fayed əmin edir ki, Diana Dodidən hamilə olub. Cütlük Britaniyaya qayıtdıqdan sonra Harri və Uilyama bu barədə məlumat veriləcəkdi. Şahzadə bunu 1 sentyabr tarixində etmək istəyirdi.

Yeni iddia

Britaniya qanunlarına görə Çarlz kral omaq üçün nikahı kilsə tərəfindən təsdiqlənməli idi. Amma Çarlz Diana ilə boşanmışdı. Kilsə isə boşanmış adamın nikahını məqbul saymırdı. Bəlkə də Diananın ölümünə bu səbəb olmuşdu?