Bayram və istirahət günlərində təcili yardıma müraciətlərin sayı artıb
Dünya Azərbaycanlıların Həmrəyliyi Günü, Yeni il bayramı və istirahət günlərində (31 dekabr - 5 yanvar) təcili yardıma daxil olan müraciətlərin sayı artıb.
Ölkə.Az xəbər verir ki, Bakı Şəhəri üzrə Təcili və Təxirəsalınmaz Tibbi Yardım Stansiyasının baş həkiminin müavini Murad Mirzəzadə APA-ya bildirib ki, bu da bayram və istirahət günlərində poliklinikaların işləməməsi ilə bağlıdır.
Onun sözlərinə görə, adi günlərdə təcili yardıma gün ərzində 2000-ə yaxın müraciət daxil olurdusa, bayram günlərində onların sayı 2800-dən çox olub:
“Bu günlərdə heç bir fövqəladə hal qeydə alınmayıb. Müraciətlər əsasən, soyuqdəymə, qızdırma və təcili yardıma aid digər hallarla bağlı olub. Ümumilikdə isə təcili yardım briqadaları bayram və istirahət günlərində gücləndirilmiş iş rejimində və növbətçilik əsasında fəaliyyət göstərib”.
M.Mirzəzadə onu da qeyd edib ki, bayram günləri 138 briqada iş başında olub: “Bölmələrdə məsul şəxslərin hamısı növbəlilik prinsipi əsasında gücləndirilmiş iş rejimi əsasında işləyib. Bütün müraciətlər vaxtında öz həllini tapıb və gecikmə ilə bağlı heç bir şikayət olmayıb. Bir faktı da əlavə edim ki, təcili və təxirə salınmaz çağırışları ilk növbədə həll etmişik”.
