Azərbaycanda elektronlaşdırılan təhsil nə verəcək?

Azərbaycan həm orta, həm də ali təhsil elektronlaşır. Bunun üçün artıq Strateji Yol Xəritəsi də hazırdır. Rəqəmsal təhsil konsepsiyası sənədi adı ilə həyata keçiriləcək dəyişikliklər təhsildə informasiya texnologiyalarının tətbiqi baxımından böyük dönüş yaradacaq. Ekspertlər bunun çox uğurlıu addım olduğunu düşünürlər.

 

Təhsil üzrə ekspert Kamran Əsədov Ölkə.Az-a açıqlamasında bildirib ki, bu həm dövlət, həm də təhsil alanlar üçün uğurlu addımdır.

 

“Dünya təhsilində ən uğurlu addımlardan biri elektron təhsil sisteminə keçiddir. Bu həm dövləti hər il kitab, test və digər dərs vəsaitlərinə çəkilən xərclərdən azad edir, həm də şagirdlərin ağır çantalardan qurtulmasına şərait yaradır”, - deyə Kamran Əsədov bildirib.

 

Ekspert deyir ki, Azərbaycan Respublikası Təhsil Nazirliyi də 2011-ci ildə ölkə rəhbərliyinə təhsil sisteminin informasiyalaşdırılması, təhsildə elektron dərsliklərdən istifadə ilə bağlı layihə irəli sürüb və bu məsələ müzakirə edilərək qəbul olunub:

 

“Layihədə elektron təhsillə bağlı mütün maddələr detallı şəkildə öz əksini tapıb. Lakin Azərbaycan təhsilinin informasiyalaşdırılması və təhsildə elektron vasitələrdən istifadə tam formada həyata keçirilə bilmir. Biz hələ də, 70 il əvvəlin tədris sistemində qalmışıq. Hesab edirəm ki, elektron təhsildən istifadə etsək, bir sıra üstünlüklər - əyani dərs vəsaitlərin sayı azalması, rahat hərəkət, mobillik, sürətlilik kimi üstünlüklər əldə edə bilərik. Adicə qonşu Gürcüstanda şagirdlər 10 kq ağırlığında çantalarla məktəbə getmirlər. Dövlət və Təhsil Nazirliyi şagirdlərin hər birinə planşetlər verib. Həmin planşetlərə ölkənin Təhsil Nazirliyinin hazırladığı elektron dərsliklər yüklənib. Şagirdlər tədris müddətində lazımi elektron dərs vəsaitləri və internetlə təmin olunub. Bizdə isə təəssüflər olsun ki, elektron dərsliklər, ümumilikdə, elektron təhsil demək olar ki, fəaliyyət göstərmir. Sadəcə olaraq, Təhsil Nazirliyinin elektron dərsliklərlə bağlı saytı var və oraya ənənəvi dərsliklər yüklənib. Bu gün Azərbaycanda 1 miyon 400 mindən çox şagird var, amma electron portaldan istifadə sayə bir milyondur. Deməli, azı hər kəs bir dəfə istifadə edib, faydasını görə bilməyib, birdə müraciət etməyib2.

 

K.Əsədovun fikrincə, tərtib olunmuş proqram rahat və əlçatımlı deyil:

 

“Problem odur ki, istər məktəblərimiz, istərsə də müəllimlərimiz elektron təhsildən istifadəyə tam hazır deyillər. 2007-ci ildən bəri ölkə rəhbərliyi hər bir şagidə kompüter verilməsinə başlayıb. Lakin 1 milyon 400 mindən çox şagird olsa da, hazırda hər 30 şagirddən 1-inə kompüter çatır. Bundan əlavə, region məktəblərinin internetlə və müasir elektron avadanlıqlarla təminatı tam olaraq həll edilmədiyindən, bir sıra problemlər yaşanır. Yalnız bu məsələlər həllini tapsa, elektron təhsilə keçid edilə bilər”.