"İqtisadiyyat istehsala yox, istehlaka yönəldilib"

Ermənistan sənayesinin səviyyəsi hələ də sovet dövründəki səviyyədən 5-6 dəfə aşağıdır

Bu barədə jurnalistlərə Ermənistanın Yerli Məhsul İstehsalçıları İttifaqının sədri Vazgen Safaryan bildirib.

Onun sözlərinə görə, 2014-cü ilin yanvarından sentyabradək olan dövrün nəticələrinə əsasən ən böyük vergi ödəyicilərinin onluğunda yalnız üç istehsalçı – Zəngəzur mis-molibden kombinatı, “Grand Tobacco” və İrəvan Konyak Zavodu yer alıb.

O deyib: "Bu, ölkə sənayesindəki enişin, tənəzzülün parlaq nümunəsidir."

V.Safaryan xatırladıb ki, hökumətin 2015-ci il üçün dövlət büdcəsində ÜDM-də sənayenin payı 17%, kənd təsərrüfatı üzrə 19% və digər xidmətlər üzrə 41% nəzərdə tutulub. Bir sözlə, iqtisadiyyat istehsala yox, istehlaka yönəldilib: "Bunu ötən əsrin 80-ci illərində Sovet İttifaqının göstəriciləri ilə müqayisə edin, o vaxt ümumi daxili məhsulda sənaye istehsalı 68% təşkil edirdi. Mütləq ifadədə bu 9,2 milyard rubl idi. İndi sənayedə istehsalatın həcmi cəmi 2 milyard dollardır. Sovet rublunu indiki dollarlara hesablasaq, bu, 5- 6 dəfə azalma deməkdir.

Göründüyü və özlərinin də etiraf etdiyi kimi, Ermənistan iqtisadiyyatı həqiqətən çökür. Təbii ki, bu iqtisadi tənəzzülü görən yerli sakinlər ölkəni tərk etmək məcburiyyətində qalır. İndi işsizlik, dolanışıq səviyyəsi ölkə üçün əsl problemə çevrilib. Bu iqtisadi çöküş bundan sonra da davam edəcək. Çünki bu ölkə daim onun-bunun yardımı ilə yaşayıb, daim "böyük qardaşlarının əlinə" baxıb və indidə bu vərdişindən əl çəkmir. Ölkənin siyasi rəhbərliyi isə xalqı köləlik düşüncəsi ilə yaşadır, hakimiyyətdə qalmaq üçün min cür yalan-palana, oyunbazlığa əl atır. Amma unutmayaq ki, iqtisadiyyatı olmayan dövlətin axırı yoxdur və bu, dövləti idarəedənlər üçün də böyük faciələrə yol açır./Anspress/

Ölkə.Az