Bakı metrosunda yanğın həyəcanı

Bu gün səhər saatlarında metronun Qara Qarayev stansiyasında yanğın baş verib. 

Həzi Aslanov istiqamətində hərəkət edən qatarın sonuncu vaqonunda kiçik yanğın hadisəsi olub. Qara Qarayev metrostansiyasında qatarı saxlayaraq, sərnişinləri vaqonlardan kənarlaşdırıblar. 

Hər kəs həyəcanla nə baş verdiyini öyrənməyə çalışıb. Məlum olub ki, qatarın sonuncu vaqonunun alt hissəsində naməlum səbəblərdən yanğın baş verib. Hadisə zamanı baş verənləri öz mobil telefonu ilə qeydə alan sərnişinlərdən biri həmin videonu redaksiyaya göndərib. 

Təqdim edəcəyimiz videogörüntülərdən məlum olur ki, maşinistlərdən biri yanğınsöndürmə balonları ilə alovu söndürməyə çalışır. Amma onun bu cəhdləri yaxşı alınmır. Çünki yanğınsöndürmə balonları ya boşdur, ya da çalışmır. 

Xoşbəxtlikdən bir müddət sonra baş vermiş qəza aradan qaldırılıb və qatarın hərəkəti bərpa olunub.

Amma bu hadisə bəzi suallar ortaya çıxarır. 

Əgər yanğın daha böyük olsaydı, o zaman bunun qarşısı necə alınacaqdı? Yanğınsöndürmə balonlarının içi niyə boşdur və işlək deyil? Görəsən, digər qatarlarda vəziyyət necədir? Digər qatarlarda yanğınsöndürmə balonları işləyirmi? (musavat)

Ölkə.Az