Azərbaycan siyasətçiləri Trampın andiçmə mərasimini belə şərh etdilər
Prezidentlik müddəti başa çatan Barak Obama və ölkənin sabiq birinci xanımı Mişel Obama Tramp ailəsini Ağ Evdə qəbul etdilər.
Bundan sonra isə ABŞ-ın 45-ci prezidenti Donald Trampın andiçmə mərasimi olub. Maraqlıdır ki, Tramp andiçmə mərasimində seçki kampaniyasındakı vədləri yenidən təkar edib. Bu isə Trampın vədlərini yerinə yetirəcəyindən xəbər verir.
Trampın vədləri, inauqurasiya mərasimi və Obama ilə səmimi görüşüb ayrılması barədə partiya sədrləri Ölkə.Az-a açıqlama veriblər:
"Azərbaycan Sosial Demokrat Partiyası"-nın sədri Araz Əlizadə:
"Donald Trampa dediklərini həyata keçirməyə imkan versələr, dünyada vəziyyət daha yaxşı olacaq. Əmin-amanlıq olacaq və ABŞ doğrudan da çiçəklənən bir dövlətə çevriləcək. Ancaq Trampın rəqibləri çox güclüdür. Trampa mane olmağa çalışacaqlar.
Obama ilə Tramp inauqurasiya mərasimində çox gözəl şəkildə sağollaşdırlar. Müsəlmanlarda isə gələn gedəni məhv edir. Bunlar isə müsəlman deyil ki, bir-birini yesinlər".
"Azərbaycan Xalq Cəbhəsi Partiyası"-nın sədri Razi Nurullayev:
"Obama qaradərili olduğu üçün prezident seçiləndə ABŞ-da çox böyük ajiotaj yaranmışdı. Bütün dünyann gözü ABŞ-a dikilmişdi.
Obamadan sonra isə Donald Tramp bu ajiotajı yarada bildi. Dünən də Tramp inauqurasiya mərasimində seçki kampaniyası dövründə verdiyi vədləri bir-bir xatırlatdı. Belə görünür ki, Donald Tramp verdiyi vədlərdən geri çəkilməyib. Belə başa düşürəm ki, dünyanı ciddi dəyişikliklər gözləyir. Azərbaycan üçün də, dünya üçün də nələrisə yeniləmək lazım gələcək.
ABŞ-da siyasi mədəniyyət var. Bu siyasi mədəniyyət artıq 200 ildən çoxdur ki, ABŞ-da davam edir. Onun üçün də bu ABŞ-ın şəxsi həyatında olan bir hadisə yox, ABŞ insanlarının təfəkkürüdür. Bu çox gözəldir. Azərbaycan insanları da bunu gördü. Bizdə də, dünyanın hər yerində də bu cür siyasət olmalıdır".
"Ümid Partiyası"-nın sədri İqbal Ağazadə:
"Dünyanı bundan sonra nələrin gözlədiyini demək çətindir. Trampın mesajları ziddiyətlidir. Hər şey ABŞ üçündür, dünyada terrorun kökünü kəsəcəyik demək ziddiyətli açıqlamadır. Çünki terror ABŞ-da deyil. Terror ABŞ-dan kənardadır. İndidən nəyisə demək, proqnozlaşdırmaq bir qədər çətindir.
Prezidentlərin bir-birini yola salması, demokratik seçkilərin nəticəsini tanıyaraq bu mövqeni tutmaq gözəl bir şeydir. Arzu edirəm ki, Azərbaycanda da belə olsun"
"Azərbaycan Demokrat Partiyası"-nın sədri Sərdar Cəlaloğlu:
"ABŞ-da 200 ildən çoxdur ki, oturuşmuş demokratiya tarixi var. Demokratik ənənələr var, siyasi mədəniyyət formalaşıb, siyasi qüvvələr arasında qarşılıqlı hörmət var. Orada hakimiyyət kiminsə qrup maraqlarına xidmət etmir. Ona görə də, bir-birinə qarşı ədavətləri yoxdur.
Yəqin ki, bu cür halı Azərbaycanda da nə vaxtsa görəcəyik".
"Müasir Müsavat" partiyasının sədri Hafiz Hacıyev:
"ABŞ demokratiyasından, ənənələrindən biz də istifadə etməliyik. Dünən Obama və xanımı yeni prezident Donald Tramp və onun xanımını qarşıladılar, çay süfrəsi arxasında oturdular və çox mehribancasına ayrıldılar. Bu böyük bir ənənədir. Dövlətin əsas sütunlarından biridir. Burada qərəz yoxdur, hakimiyyətin dinc yolla ötürülməsidir.
Trampla mənim əlaqələrim olub, hazırda münasibətim də var. Bunu Azərbaycanda bilməyən adam yoxdur. Tramp siyasi arenada naşıdır. Tramp biznes sahəsində çox böyük şəxsiyyətdir, siyasi sahədə ona şəxsiyyət demək olmaz. Dövləti idarə etmək üçün siyasi təcrübə lazımdır. Bu hələlik Trampda yoxdur.
Trampla Vaşinqtonda, Nyu-Yorkda olan görüşlərimizdən əldə etdiyim təəssüratlardan ona daha yaxşı qiymət verə bilərəm. İstərdim ki, biznesdə olan uğurlarını siyasətdə də qazansın.
Tramp da mənim kimi siyasi cığal adamdır. Trampı prezident seçilməsi münasibəti ilə təbrik etmişəm. Çalışacam aprel-may aylarında Vaşinqtona səfər edib, Trampla üz-üzə görüşüm. Gələcək Azərbaycanın prezidenti kimi istərdim ki, onunla fikir mübadiləsi aparım".
Səxavət Məmməd
Ölkə.Az
