"Xarici məşqçilər neftimizin və pulumuzun iyinə gəlir, futbolu inkişaf etdirməyə yox"

AFFA prezidenti Rövnəq Abdullayev yığma komandaya yenə xarici baş məşqçi gətirəcəyini deyib.

Bununla bağlı Ölkə.Az futbol həvəskarı olan jurnalist və baş redaktorlar arasında sorğu keçirib. Onlara bu sualları yönəltdik: "Rövnəq Abdullayev yığma komandaya yenə xarici baş məşqçi gətirəcəyini deyib, buna münasibətiniz? Ümumiyyətlə milli komandanın baş məşqçisi yerli olmalıdır, ya xarici?"

Köşə yazarı Nail Nürəddinoğlu: "Rövnəq Abdullayev kimi gətirir-gətirsin, o yığmada yenə Mahir Şükürov oynayacaq. Məsələ Mahirdə deyil, Azərbaycanda yüksək səviyyəli futbolçu yoxdur. Məsələ futbol da deyil, bu, insan problemidir. Peşəkarlıq problemidir. Yaxşı şərait futbolda vacib məsələdir, amma bizim futbolçular avtobusdan düşüb 100 minlik avtomobillərə oturandan sonra da heç nə dəyişmədi. Çünki problem təkcə şəraitdə yox, o futbolçulardadır. Yəni, Mourinyo da gəlsə, çox şey dəyişməyəcək. Amma belə mütləq ad çəkməliyəmsə, "Turan"da olanda 4 ölkədən 6 məşqçi ilə işləmişəm və deməliyəm ki, mənim üçün Asim İbrahimovdan üstün məşqçi yoxdur bu ölkədə..."

Köşə yazarı Rəşad Müseyibzadə: "Kimi gətirirlər gətirsinlər, fərqi yoxdur. 10 illik dövlət proqramı iflasa uğradı. Daha bir 10 il lazımdı. Amma bunu sistemli qurmalıdırlar. Bütün yaş qrupları üzrə yığmalara eyni sistemi aşılamaq lazımdır ki, əsas yığmada artıq bir-birilərinə alışsınlar. Yoxsa xarici və ya yerli kimisə gətirsən elə ciddi uğur olmayacaq. Bura gələn məşqçiye demək lazımdır ki, bütün yaş qruplarının milliləri ile maraqlan. Amma bizdə günlük uğurlara diqqət verdikləri üçün belə bir şey gözləmək çətindir. Ona görə də kimi gətirirlər gətirsinlər..."

Musavat.com saytının şef radaktoru Xalid Kazımlı: "Milli yığmanın məşqçisi xarici də ola bilər, yerli də. Bu əsas şərt deyil. Əsas şərt odur ki, adam elmli, erudisiyalı, səriştəli biri olsun və milli futbolumuza töhfə verə bilsin, onu irəli aparsın. Kamerunu futbol dövləti kimi tanınan məşqçi rus Bışovets olmuşdu. O vaxtdan bəri Kamerun yaxşı oynayır, öndə olur. Bizə də elə bir məşqçi lazımdır…"

Publika.az-ın baş redaktoru Amil Hacıyev: "Xaricdən məşqçi gətirmək nəyimizə lazımdır? Qurban Qurbanovumuz var. Qarabağın oyun üslubuna baxanda adamın ürəyi açılır. Qurban tam hazırdır. Bəzi qüvvələr ona işləməyə imkan versin, vəssəlam. 3 ilə Qurban millini ortabab səviyyəyə çatdırar da irəli də aparar. Əcnəbiyə gəlincə, hazırı var - Kaxaber Sxadadze... Nəticə verir, komandanın oyun üslubu var və 6 ildir ölkəmizdə işləyir, futbolumuza və futbolçularımıza bələddir. Qalanları isə neftimizin və pulumuzun iyinə gəlir".

Pressing.az saytının rəhbəri Röya Kərimli: "Azərbaycanda istər milli, istərsə də klub səviyyəsində uğursuzluq olanda ilk qınaq obyekti və işindən azad olunanlar baş məşqçilər olur. Burada istənilər bir klubumuzu məsəl çəkmək olar? Tutaq ki, "Xəzər Lənkəran". Kimlər gəlid, kimlər getdi. Con Toşak, Mustafa Dənizli kimi tanınmış mütəxəssislərin Azərbaycan xarizmaları "çizildi". Eləcə də, Azərbaycan millisində Karlos Alberto Torres, Berti Foqts kimiləri. Ümumiyyətlə, uğursuzluqda 100% məşqçini günahlandırmaq olmaz. Axı meydana çıxıb oynayan, qol vuran ya top tutan məşqçi deyilki. Baş məşqçi uzaqbaşı taktiki gedişdə səhvə yola verə bilər. Ki, peşəkar futbolçu meydançada nə edəcəyini yaxşı bilməlidir. Hər kəs Berti Foqtsun istefasını istəyirdi və bu reallaşdı. İndi bununla millinin uğurları gələcək deyə gözləyirlərsə, məncə, yanılırlar. İstər Foqts olsun, istərsə də Mourinyo, xeyri yoxdur. Bizim futbolçuların bacarıqları bundan artıq deyil. Onlar 15-16 yaşlı millinin üzvləri deyil ki, baş məşqçi onlara top vurmağı, ya hansısa bir hərəkət öyrətsin. Biraz irəliləyən kimi "ulduz xəstəliyi"nə tutulub, özlərini Messi, Xavi, Ronaldo hiss edirlər. Ancaq uğursuzluq olan kimi, günahkar oldu məşqçi. Belə bir məsəl çəkmək istəyirəm, müəllim sinifdə 30 şagirdi normal şəkildə dərsi başa salırsa və bundan cəmi 5-i bunu yaxşı başa düşürsə, burada günahkar müəllim deyil. Hər uşağın öz anlayış, bilik səviyyəsi var. Futbolçular da elə. Onlara taktika verilir. Yaxşı və pis icra etmək artıq oyunçudan asılıdır. Qardaş deyirlər Foqts səhv taktika qurdu. Görürsüz alınmır bu gediş. sizdə "peşakar, ulduz" futbolçu olaraq alınacaq şəkildə oynayın da. Konkret sorğunun sualına gəlincə. Fikrimcə, milliyə yerli baş məşqçi gəlməlidir. Niyə? Çünki əcnəbi məşqçilərə pul çox xərclənir. Nəticə isə, sıfıra sıfır, əldə var sıfır. Yerlilərə isə elə də yüksək məbləğ xərcləmək gərək deyil. Bu səbəbdən milliyə Azərbaycanın işsiz qalan mütəxəssislərindən birinin gəlməsi daha yaxşı olar. Çoxları isə Qurban Qurbanovun yığmaya baş məşqçi gəlməsinin tərəfdarıdır. Ancaq hər rəhbərlik "Qarabağ"ın rəhbərliyi kimi olmaz ki, illərcə səbr edib, yavaş - yavaş yaxşı kollektiv qurub bu gün belə nəticələr əldə edə. Qurbanov milliyə gələrək imicini zədələməsin. Çünki 2-3 oyunda uğursuzluqdan sonra Qurban Qurbanovu da istefaya səsləyib, ucuzlaşdıracaqlar işini”.

Sport7.az-ın redaktoru Emil Vəliyev: "Əcnəbi məşqçinin nə etdiyinə hamımız şahid oluq. Təcrübəli yerli məşqçilərimiz var, Böyükağa Hacıyev, Ağasəlim Mircavadov kimi. Əlbəttə yerli məşqçi olsa daha yaxşı olar. İndi Rövnəq Abdullayev Mançiniyə təklif yollamaq istəyir. Mançini gəlib neyniyəcək? Bir gün oda yarımçıq atıb gedəcək millimizi".

Səxavət Məmməd

Ölkə.Az