Əslən azərbaycanlı olan türkiyəli müğənni Bakıda

Emre Kaya: "Həyatımda bir xanım var və çox xoşbəxtəm"

Ölkə.Az xəbər verir ki, tanınmış türkiyəli müğənni Emre Kaya noyabrın 10-da verəcəyi konsert öncəsi mətbuat konfransı keçirib.

Əslən azərbaycanlı olduğunu deyən müğənni bir sıra məqamlara aydınlıq gətirib:

"Soy-köküm əslən azərbaycanlıdır. Babalarım illər əvvəl Bakıdan Türkiyəyə köçüblər. Ona görə də, Bakıda özümü yad hiss etmirəm. Uzun zamandır Bakıya gəlməyi planlaşdırırdım, amma qismət bu vaxta imiş". 

Bakıya gəlişinin səbəbləri barədə danışan Emre kaya burada yeni klip çəkəcəyini də bildirib:

"Bir neçə gün ərzində həm Bakını gəzəcəyəm, həm də yeni klipimin çəkilişlərini edəcəyik. Konsert barədə onu deyə bilərəm ki, izləyiciləri bir sıra sürprizlər gözləyir. Sevinclə duet də oxumağı da düşünürəm".

Şəxsi həyatı barədə sualları cavabsız qoyan Emre Kaya qeyd etdi ki, həyatında bir xanım var:

"Bəli, həyatımda bir xanım var və mən onunla çox xoşbəxtəm. Amma bu münasibət işlərimə əngəl yaratmır".

Konsertdə Emre Kaya ilə eyni səhnəni bölüşəcək olan Sevinc Ağaşirinova fikirlərini belə ifadə etdi:

"Düzdür, Emre ilə ilk tanışlığımdır. Mətbuat konfransından öncə mənə duet oxumağı təklif etdi və biz razılaşdıq. Türkiyə şou-biznesinə qoşulmaq istəyərəm. Niyə də olmasın?! Konsertdə isə Emrenin dediyi kimi qonaqları sürprizlər gözləyir. Eyni zamanda köhnə və yeni mahnılarımı ifa edəcəyəm".

Ölkə.Az olaraq Emre Kaya və Sevinc Ağaşirinovanın mətbuat konfransından fotoları sizlərə təqdim edirik:

Kamil Əmirli

Ölkə.Az