Türkiyə ilə Yunanıstan arasında hər an gərginlik arta bilər
Türkiyə tərəfinin israrlarına baxmayaraq, Yunanıstan elə həmin ərəfələrdə hərbçiləri Türkiyəyə təhvil verməkdən boyun qaçırdı. Afina Ali Məhkəməsi isə Türkiyənin iddiasını təmin etməyib.
Bəzi ekspertlər Afina Ali Məhkəməsinin bu qərarının iki ölkə arasında gərginliklə nəticələnəcəyini bildirib.
Türkiyə ilə Yunanıstan arasında baş verən son hadisəni politoloq Adıgözəl Məmmədov Ölkə.Az-a şərh edib:
"Bu, mövcud qanunvericiliyə uyğun olaraq icra olunmalıdır. Türkiyə ilə Yunanıstan arasında axtarışda olan insanların bir-birinə təhvil verilməsi şərtləri var. O şərtlərə uyğun olaraq da hər bir ölkə mövcud qanunvericiliyə uyğun olaraq çıxış edir.
Bu məsələdə qanunlardan daha çox siyasi motivasiya önə çıxır. Yunanıstan siyasi rəhbərliyinin istəyi olsa idi, bu məsələni istənilən hüquqi formaya otuzdura bilərdi. Görünən budur ki, Yunanıstanın özünə də müəyyən təzyiqlər var və bu təzyiqlərə görə həmin 8 nəfəri Türkiyə hüquq-mühafizə orqanlarına təhvil vermirlər. Bu, FETÖ hərəkatının və onların ABŞ-dakı havadarlarının nə qədər böyük təsirə malik olmasını göstərir. FETÖ və onun havadarları Türkiyə ilə Yunanıstan arasında gərginlik yarada biləcək iradəyə malikdirlər".
Bu hadisənin iki ölkə arasında nə ilə nəticələnə biləcəyinə münasibət bildirən politoloq bildirdi ki, hesab etmirəm ki, bu hadisə iki ölkə arasında iplərin qopmasına gəirib çıxarsın:
"Bunun üçün şərait yoxdur. Yunanıstanla Rusiyanı provaslav bir keçmiş birləşdirir. Rusiya-Türkiyə münasibətlərini göz önünə gətirsək əlbəttə ki, bu hadisə Yunanıstan-Türkiyə münasibətlərinin tam qırılmasına gətirib çıxarmayacaq. Ən azı Rusiya bunu istəməyəcək.
Yunanıstan Avropa İttifaqının üzvüdür. Türkiyənin Avropa İttifaqı ölkələri ilə yaxşı münasibətləri var. Avropa İttifaqı ilə Türkiyə arasında siyasi gərginlik olsa da, Türkiyə iqtisadiyyatı daha çox Avropa İttifaqı ölkələri ilə dövriyyəyə malikdir. Türkiyə NATO-nun üzvüdür. ABŞ da Yunanıstanla Türkiyə arasında gərginliyin yaranmasının marağında deyil. Bu faktorlar Türkiyə ilə Yunanınstan arasında iplərin tamamilə qopmasına mane olacaq.
İki ölkə arasında qarşılıqlı bəyanatlar səsləndiriləcək. Hətta qarşılıqlı ittihamlar da olacaq, ancaq bu müəyyən müddətdən sonra öz axarına düşəcək".
Səxavət Məmməd
Ölkə.Az
