Rusiyanın ABŞ-ın “ürəyinə yol tapmaq” istəyi Britaniyadan keçir

Politoloq Elxan Şahinoğlu Ölkə.Az-a açıqlamasında bildirib ki, Rusiyanı indi bircə məqam maraqlandırır. Onun fikirincə, rusların əsas məqsədi Britaniya ilə münasibətləri qaydasına salmaqdır.

“Londonda Rusiya xəfiyyəsinin keçmiş əməkdaşı qətlə yetirilmişdi. Böyük Britaniya bu qətldə Rusiyadakı kəşfiyyatçıları günahlandırdı. Həmin adamların Böyük Britaniya məhkəməsinı verilməsini istədi. Rusiyada onları vermədi. Şübhə qaldı ki, həmin şəxsin öldürülməsində Rusiya kəşfiyyatının əli olub. Bu da iki ölkənin münasibətlərini daha da soyutdu. Üstəlik Rusiya Krımı işğal etdikdən sonra Dombas seperatçılara dəstək verdi. Bu münasibətləri daha da gərginləşdirdi. Bunun ardından Londondan sərt açıqlamalar gəldi. Böyük Britaniyanın indiki xarici işlər naziri Boris Conson da Rusiyanın xarici siyasəti əleyhinə çox sərt açıqlamalar verdi. Buna rəğmən Rusiya Boris Consonu Moskvaya dəvət edibsə, deməli Rusiya bu münasibətlərin istiləşməsinə maraqlıdır. Əlbəttə bu çətin bir proses olacaq”, - deyə Elxan Şahinoğlu bildirib. 

Bəs Rusiya nəyi hesablayır?

Elxan Şahinoğlu deyir ki, Rusiyanın Britaniya ilə münasibətlərini yaxşılaşdırmaq cəhdi ABŞ-ın “ürəyinə yol tapmaq” istəyindən qaynaqlanır:

“Böyük Britaniya ABŞ-ın əsas müttəfiqidir. Böyük Britaniya Avropa İttifaqından çıxıb. Yəqin Rusiyada düşünürlər ki, Amerikanın prezidenti Donald Tramp Rusiyaya yaxınlaşmaq istəyirsə, eyni yolu Böyük Britaniya da seçə bilər. Çünki Böyük Britaniya Amerikanın müttəfiqidir və onun xarici siyasətilə hesablaşmalıdır. Düzdür bu səfərin iki ölkənin münasibətlərinin yaxşılaşmasına rəvac verəcəyini söyləmək çətindir. Lakin Rusiyanın müəyyən hesabları var”.

Ziya Səccad
Ölkə.az