İran prezidentindən Trampa sərt mesaj

Ölkə.Az xəbər verir ki, Ruhani Trampın bu addımını tənqid edib. 

"Bu gün xalqlar arasında divar hörüləcək vaxt deyil. İllər əvvəl Berlin divarının uçurulduğunu unutdularmı? Xalqlar arasında divar olsa da götürülməlidir. Bu günkü dünya, müxtəlif torpaqlarda yaşayan xalqlar arasına məsafə qoyulacaq dünya deyil", - deyə Həsən Ruhani bildirib.

İrandan başqa, bu məsələyə bir neçə saat əvvəl Türkiyə hökuməti də münasibət bildirmişdi. Türkiyənin Baş naziri Binəli Yıldırım İngiltərənin baş naziri Tereza Meylə görüş zamanı bu məsələyə toxunub. Baş nazirin sözlərinə görə, sərhəddə divar tikməklə problemləri həll etmək olmaz.

Xatırladaq ki, Donald Tramp yanvarın 25-də Meksika ilə sərhəddə divarın ucaldılmasına dair fərman imzalayıb. ABŞ-la Meksika sərhəddində divarın tikintisi 12-15 mlrd. dollara başa gələcək. Tramp istəyir ki, tikinti zamanı çəkilən xərclər Meksika dövlətinin büdcəsi hesabına ödənilsin. Meksika prezidenti Enrike Penya Nyeto isə bildirib ki, divaırn tikintisinə çəkilən xərclərə Meksika dövləti pul ayırmayacaq. 

Tramp isə həmin vəsaiti çıxartmaq üçün Meksikadan ABŞ-a gələn mallara 20 faiz əlavə vergi qoyacaq. Bu qərar həm də Amerika vətəndaşlarını da narahat edib. Çünki Meksikadan Amerika mal gətirən həmin insanlara da problem yaranacaq.

Ziya Səccad
Ölkə.az