Binəli Yıldırım: “Böyük Britaniya və Türkiyə terrorizmə qarşı mübarizədə daha sıx əməkdaşlıq edəcək”

Türkiyənin baş naziri Binəli Yıldırım, Türkiyədə səfərdə olan Böyük Britaniyanın baş naziri Tereza Mey ilə danışıqların yaxşı nəticələr verəcəyini bildirib.

Ölkə.Az xəbər verir ki, baş nazir bildirib ki, danışıqlara əsasən bundan sonra iki ölkə qarşılıqlı əməkdaşlıq edəcək. Onun sözlərinə görə, bundan sonra Böyük Britaniya və Türkiyə terrorizmə qarşı mübarizədə daha sıx əməkdaşlıq edəcək.

"Müzakirə etdiyimiz mövzular arasında iyulun 15-də baş vermiş çevriliş cəhdi olub. Biz hörmətli T.Meyə bildirdik ki, Fətulla Gülən hərəkatı Böyük Britaniyada və bütün dünyada fəaliyyət göstərir. Biz bununla əlaqədar Böyük Britaniyaya zəruri tədbirlərin aparılmasını xahiş etdik", - deyə B.Yıldırım qeyd edib.

Baş nazir həmçinn danışıqlar zamanı iki ölkənin iqtisadi əlaqələrinə də toxunulduğunu deyib. Onun sözlərinə görə, bundan sonra iki ölkə iqtisadi tərəfdaşlığı da inkişaf etdirə bilər. Danışıqlar zamanı ABŞ prezidenti Donald Trampın və Amerikanın yeni siyasəti barədə də fikir mübadilələrinin aparıldığını qeyd edən B.Yıldırım bu məsələdə də Türkiyə ilə İngiltərənin mövqeylərinin uyğun olduğunu deyib.

Ziya Səccad
Ölkə.az