Almeyda da “Adanaspor”a keçir?

Ölkə.Az xəbər verir ki, oyundan sonra baş tutan mətbuat konfransında “Qarabağ”ın baş məşqçisi Qurban Qurbanov fikirlərini bölüşüb:

““Neftçi”yə uğurlar arzu edirəm, yaxşı oynadılar. Azarkeşlər üçün, komanda üçün maraqlı oyun oldu. Bilirdik ki, bizə çətin olacaq. Futbolçularıma gəldikdə, nöqsanlar oldu. Amma onlara irad bildirməyəcəm. Ümid edirəm ki, qarşıdakı oyunlarda optimal formamızı bərpa edəcəyik”.

 - Riçard Almeydanın da adı “Adanaspor”la hallanır...

- Yox, doğru məsələ deyil.

 - “Qarabağ” uzun müddətdi belə pressinqlə üz-üzə gəlmirdi. Bu fikirlə razısız?

- Razıyam. “Neftçi” bu gün bizim meydanımızda pressinq edirdi. Bu, bizim üçün xoş oldu. Belə vəziyyətdə biz də futbolçularımızın hansı cəhətdən güclü olduğunu görürük. Belə rəqiblərin çox olması bizim xeyrimizədi. Get-gedə çox komandalar “Neftçi”nin üsulundan istifadə edirlər. Və bu, istənilən komandaya çətinlik yaradır. Ümumilikdə, “Neftçi” oyunu pressinq üzərində qurmuşdu və sona qədər belə davam etdilər.

 - Namiq Ələsgərov sizə qarşı oynasaydı daha çətin olardı?

- Düşünmürəm. Bu, bir oyunçudan asılı deyil. Bizim müqaviləmizdə belə bir şərt yoxdu. Bildiyiniz kimi, biz Namiqi “Neftçi”yə azad futbolçu kimi buraxmışıq. Bizim rəhbərlik bu qaydanı ortaya qoydu və “Neftçi” də razılaşdı.

 - Riçardın olmaması oyununuza təsir etdi?

- Almeyda əsas oyunçumuzdu. Almeydasız çox oyunlarda qalib gəlmişik. Əsas heyət oyunçusunu itirmək xoş olmasa da, onun yerini doldura biləcək oyunçularımız da var.

 - Samuel Armenteros müsahibəsində demişdi ki, Qurban Qurbanov mənə “səni komandada görmək istəmirəm” söyləyib. Bu məsələ barədə nə deyə bilərsiz?

- Alicənablıq göstərmək lazımdı. Mən futbolçunu komandada görmək istəmirəmsə, bunu açıq deməyim doğru olmaz. Bu, ona təsir edə bilər. Biz oyunçularımızı hörmətli şəkildə yola salmağa çalışırıq. Sadəcə, oyunçulara deyirik ki, sənin oynamaq şansın çoxdu və ya azdı. Ağ yalan kimi qeyd etmişdilər. Yalanın bilmirəm, ağı və ya qarası olurmu? Armenteros məndən bu qədər hörmətsizlik görübsə, bir şey deyə bilmərəm. Armenterosun oynamadığı vaxtlar olub. Amma bu, onun zəif oyunçu olmağından qaynaqlanmır.