Ermənistana yerləşdirilən "Nebo-M" radar kompleksi Bakının dərinliklərinə qədər hər şeyə nəzarət etmək iqtidarındadır

Yeni radar 600 km-lik məsafə üçün nəzərdə tutulub və 1 metrə ölçüsü olan uçan cisimləri müəyyən edə bilir. Gümrüdəki 102-ci hərbi hissəyə quraşdırılan radar Ermənistanın təhlükəsizliyi baxımından heç bir önəm daşımır. Rusiya bu radar vasitəsi ilə Gürcüstan və Azərbaycanı tam, Türkiyə, İraq və İranın yarısını izləmə gücünə malikdir. Ermənistan tərəfi Rusiyanın bu addımının Azərbaycanın İsraildən aldığı "Green Pine" radar stansiyasına cavab olduğunu desə də, ekspertlər bildirir ki, əslində Rusiyanın hədəfi İncirlik bazasından istifadə edən ABŞ və NATO-nu izləməkdir.

Rusiyanın bu addımını hərbi ekspert Üzeyir Cəfərov Ölkə.Az-a şərh edib:

"Rusiyanın bu addımı bölgədə növbəti gərginlik yaradacaq. Gümrüdəki 102-ci bazada kifayət qədər avadanlıq var ki, Rusiyanın müdafiəsi və təhlükəsizliyi ilə bağlı olan məsələlərə həm nəzarət etsin, həm də yarana biləcək problemləri aradan qaldırsın. Cənub hərbi dairəsinin kurasiyasında olan həm 102-ci baza, həm də Ermənistanın silahlı qüvvələri rahat şəkildə tənzimlənir və heç bir narahatçılıq da yoxdur.

Rusiyanın 102-ci bazaya yerləşdirdiyi "Nebo-M" radar kompleksi Bakının dərinliklərinə qədər hər şeyə nəzarət etmək iqtidarındadır. Bundan əlavə, Gürcüstan da buna daxildir".

"Nebo-M" radar kompleksi ilə Rusiyanın İncirlikdəki bazaya nəzarət etmək məsələsinə gəldikdə isə hərbi ekspert bildirdi ki, Türkiyə sanki fil qulağında yatıb:

"Türkiyə görmür ki, Rusiya ona hansı sürprizlər hazırlayıb. Türkiyənin Rusiya ilə yaxınlaşması onun NATO ilə münasibətlərinin korlanmasına gətirib çıxara bilər. Rusiya ilə Türkiyənin yaxşı münasibətdə olmasını istəyən şəxlərdənəm. Ancaq Türkiyə Rusiya ilə o qədər yaxınlaşıb ki, onu əhatə edən problemləri, çətinlikləri görməməzlikdən gəlir. Türkiyənin artıq NATO və ABŞ-la münasibətləri gərgindir.

Azərbaycan həyatı boyu 102-ci bazaya hücum edən deyil, Türkiyə də həmçinin. Türkiyə üzərindən hər hansısa bir ölkə Ermənistana hər hansısa bir problem yaradan deyil. Problem yaradan tərəf Ermənistandır.

Son günlər bir üçbucaq yaranıb: Moskva, İrəvan Tehran. Ermənistanın müdafiə naziri Tehrana gedib orada bəzi danışıqlar aparacaq.

Regionda problem yaradan ölkə bəlli, işğalçılıq siyasəti aparan ölkə bəlli, gərginliyin artmasında maraqlı olan ölkə bəlli, nəyə görə bunu görmürlər? Bir gün basdırılan minalar partlayacaq. Bu gün regiona elə minalar basdırılır ki, gec-tez o minalar partlayacaq. Görünən odur ki, Cənubi Qafqaz barıt çəlləyinə dönüb. Bunun nəticəsi isə çox ağır olacaq".

Səxavət Məmməd
Ölkə.Az