Siyavuş Novruzov: “Bəzi deputatlar hərdən Türkiyəyə baxıb coşur”
Ölkə.Az-ın məlumatına görə, bunu Milli Məclisin komitə sədri, YAP icra katibinin müavini Siyasuş Novruzov parlamentin bu gün keçirilən plenar iclasında çıxşı zamanı bildirib.
S.Novruzov deyib ki, bu, əslində 2016-cı ilin davamıdır:
“Bildiyiniz kimi 2016-cı il ölkəmizdə multikulturalizm ili elan olunmuşdu. Azərbaycan Prezidentinin atdığı addımlar ancaq Azərbaycan dövlətinin və xalqının maraqlarının qorunmasına xidmət edir. Mən burada 3 məqamı qeyd etmək istərdim. Birincisi, Azərbaycan qaçqınlarının yerlərinə qayıtması üçün Covuq Mərcanlıya maliyyə vəsaitinin ayrılması. İkincisi, prezidentin hərbçilər ilə görüşü və Azərbaycan ərazilərində ikinci bir erməni dövlətinin qurulmasına imkan verilməyəcəyi haqda bəyanatı. Üçüncü, bu yaxınlarda iqtisadi müşavirədə prezidentin bütün sahələrin inkişafı və gələcək perspektivi haqda tapşırıqlar. Yalnız bu üç məsələ prezidentin xalqın maraqlarının müdafiəçisi olduğunun bariz nümunəsidir”.
Siyavuş Novruzov həmçinin yaz sessiyası zamanı iki təklifini açıqlayıb:
“Hesab edirəm ki, “Siyasi partiyalar haqqında” qanuna dəyişiklik edilməlidir. Qanunun tələbinə görə, siyasi partiyalar MSK-ya hesabat verməlidir. Biz görürük ki, siyasi partiyaların nəqliyyat vasitələri, mühafizəçiləri, işçiləri var. Bunlar hava ilə yaşamırlar. Fikrimcə, MSK-ya maliyyə hesabatı təqdim etməyən partiyalarla bağlı hansısa formada qərar qəbul edilməlidir.
İkinci təklifim mobil rabitə ilə bağlıdır. Hər axşam xaricdən telefon zəngi gəlir və kəsilir. Bu hal ərəb baharı zamanı da olurdu. Məncə, informasiya təhlükəsizliyi qanunvericiliyində dəyişiklik edə bilərik”.
S.Novruzov mətbuata müsahibə verərək deputatların fəaliyyətini tənqid edən bəzi həmkarlarını ciddi tənqid edib:
“Mətbuatda oxuyuruq, bəzi həmkarlarımız yazır ki, guya Milli Məclis işləmir. Milli Məclisin funksiyası nədən ibarətdir? Qanun qəbul edir, müzakirələr aparır. Bu qanunlar iqtisadiyyatın inkişafı, maliyyə stabilliyinin təmin edilməsi üçündür. Biz neyləyək Lenin kimi şalban götürək çiynimizə ki, işləyirik? Və ya divar hörək? Yaxud da kimsə deyir ki, bu komanda dəyişilməlidir. Sən kimsən ki, komandanı dəyişirsən? Bu komandanın yiyəsi var o da cənab Prezidentdir. Bu komanda görün nə qədər addımlar atır. Nəzərə alın ki, bizdə parlamentli respublika deyil, prezident respublikasıdır. Bəzi deputatlar hərdən Türkiyəyə baxıb coşur. Azərbaycanda korrupsiyaya qarşı ciddi mübarizə aparılır. Korrupsiya komissiyası var, Baş Prokurorluq yanında Korrupsiya İdarəsi var. Yenə deyirəm ki, hər kəsin funksiyası var. Bizim funksiyamız qanun qəbul etmək, ona nəzarət etməkdir. İnsanlar beynəlxalq təşkilatlarda ermənilərə qarşı mübarizə aparırlar. Bundan başqa nə işlə məşğul olmalıdır? Mən təklif edirəm ki, hər kəs oturduğu masaya hörmət etsin. Vaxt vardı ki, parlamentdə 4 nəfər bir otaqda əyləşirdi, 8 nəfərə bir hökumət telefonu verilirdi. İndi hər kəsin otağı, köməkçisi var. Otur işlə, alternativ qanun hazırla, qəzetdə çap elə. Əsaslandır ki, sənin hazırladığın layihə daha vacibdir. Hesab edirəm ki, bundan sonra belə hallara yol verməyə əsas yoxdur”.
Zaur Əziz
Ölkə.Az
