İŞİD siqaret satanları bu cür cəzalandıracaq

İŞİD siqaretə müharibə elan edib.

Ölkə.Az Rosbalt agentliyinə istinadən xəbər verir ki, İŞİD terror qruplaşması tərəfindən tutulmuş İraq Mosulunda siqaretin satışına görə ciddi cəza tətbiq olunub. İraqın insan hüquqları nazirliyinin bildirdiyinə görə, siqaret alveri ilə məşğul olan şəxslər qamçı cəzasına məruz qalacaq.

Siqaretin ticarəti və yayılmasına görə 80 qamçı cəzası və 700 min İraq dinarı civarında (təqribən 580 dollar) cərimə tətbiq edilib. Bundan əlavə, qanunu pozanları hətta iki illik həbs cəzası da gözləyə bilər.

Mosul universiteti əməkdaşı bildirib ki, siqaretin çəkilməsinə görə şəhərdə 20 min dinar (16 dollar) məbləğində cərimə alınır. Mosul şəhərinin digər sakini isə iddia edir ki, bu məhdudiyyətlərlə əlaqədar olaraq siqaretin qiymətləri kəskin şəkildə artıb.

"Siqaretin qiymətləri o qədər qalxıb ki, insanlar onu əldə edə bilmirlər. Bir çoxları hətta evdə belə siqaretdən istifadə etməkdən qorxurlar", - deyə, sakin bildirib.

Xatırladaq ki, bir müddət əvvəl siqaretin şəriət qanunlarına görə haram olduğu fikrində olan İŞİD üzvləri topladıqları siqaret paketlərini yandıraraq məhv etmişdilər.

Rəşid Mustafazadə

Ölkə.Az