Türkiyədə öldürülən terrorçu PKK liderinin ən sadiq adamıdır

“Ölkə.Az” xəbər verir ki, bu barədə araşdırmalar zamanı məlum olub. Əldə olunan məlumatlara görə, polislə atışmada məhv edilən Behzad ləqəbli terrorçu Murat Karayılanın “sağ əli” olub. O, bir çox terror aktlarında iştirak edibmiş. Onun Mardin vilayətinə gələrək, burada böyük terror aktları törətmək niyyətində olduğu açıqlanıb.

Qeyd edək ki, 1954-cü ildə Urfada anadan olan Murat Karayılan 1979-cu ildən PKK terror təşkilatına qoşulub. “Cemal” ləqəbi ilə məhşurlaşan Murat Karayılan bir müddət Türkiyədə terror aktları törədib. Sonradan Suriyaya qaçıb. O, Abdullah Öcalanın 1999-cu ildə saxlanılmasından sonra PKK terror təşkilatına rəhbərlik edir. Türkiyə hökumətinin 2015-ci il qərarı ilə “ən qatı terrorçu” adı verilən Murat Karayılan haqqında həbs qərarı çıxarılıb və İnterpol vasitəsilə beynəlxalq axtarışa verilib.

Fevralın 17-də Türkiyənin Mardin vilayətinin Nusaybin rayonunda təşkil edilən terror aktının birbaşa onun əmrilə planlaşdırıldığı bildirilib. Bu səbəbdən də, həmin terrora onun ən sadiq köməkçisi rəhbərlik edirmiş.

Xatırladaq ki, bu gün Türkiyədə terrorçular hüquq-mühafizə orqanlarının əməkdaşlarına silahlı hücum təşkil ediblər. Hadisə Mardin vilayətinin Nusaybin rayonunda qeydə alınıb. PKK terrorçularının hücumu nəticəsində 1 əsgər və 1 polis əməkdaşı yaralanıb.

Türkiyənin Mardin vilayətinin Nusaybin rayonunda  PKK terrorçuları ilə polis arasında baş verən atışmadan sonra əməliyyat keçirilib.Polisləri atəşə tutan terrorçuların izinə düşülüb. Polislər terrorçuları təslim olmağa çağırsalar da, onlar əmrə tabe olmayıblar. Polislə terrorçular arasında atışma baş verib. Atışma zamanı 2 terrorçular öldürülüb. Əldə edilən məlumata görə, araşdırmalar zamanı öldürülən terrorçuların kimliyi məlum olub. Onların Behzad və Musa kod adlı terrorçular olduğu məlum olub. Araşdırmalar zamanı həmin terrorçuların İstanbul, Ankara və Adana terror aktları törətdikləri də məlum olub.

Ziya Səccad
Ölkə.Az