ABŞ-da yeni etiraz dalğası

ABŞ-da prezident Donald Trampın 7 müsəlman dövlətinin vətəndaşlarına səyahət qadağası ehtiva edən qanun layihəsinə qarşı etiraz aksiyaları başlayıb

"Ölkə.Az" xəbər verir ki, Nyu-York şəhərində "Bu gün mən də müsəlmanam" adlı etiraz aksiyası keçirilir. Müsəlman, xristian, musəvilərlə yanaşı digər din və inanc sahibləri "Times" meydanında təşkil edilən mitinqlə prezidentin qərarına etirazlarını bildiriblər.

Müsəlman cəmiyyətlə həmfikir olduğunu bildirmək üçün "Def Jam Recordings" şirkətinin qurucusu Rassel Simmonsun rəhbərlik etdiyi aksiyada 1000-dən çox amerikalı iştirak edib.

Aksiyada "İbrahimin oğulları" kitabının müəllifi İmam Şəmsi Əli və Rəbbi Mark Şnayder də iştirak edib. Eyni zamanda, Nyu-York şəhər bələdiyyəsinin sədri Bill de Blasio, Hollivud ulduzu Süzan Sarandon, Çelsi Klinton, məşhur rep ustası Q-Tip və müsəlman fəal Linda Sarsur da aksiyada iştirak edib.

Trampın keçmiş dostu olan Simmons deyib: "Bu gün burada Trampın qərarına görə birləşdik. Buna görə də, bizi bir yerə topladığı üçün ona təşəkkür etmək istəyirəm. Ölkəmizdə dəyişlik olduğunu qəbul etmək məcburiyyətindəyik. Uzun illərdir ki, islamafobiya ilə mübarizə aparırıq".

Hikmət
Ölkə.Az