Suriyada dörd rus hərbçisi qətlə yetirildi

"Ölkə.Az" xəbər verir ki, minalanmış avtomobilin partladılması 4 rus hərbçinin həyatına son qoyub. Bu barədə Rusiya müdafiə nazirliyi məlumat yayıb. Məlumata əsasən, iki rus hərbçisi də yaralanıb.

Məlumatda deyilir: "2017-ci ilin 16 fevral tarixində Suriya Ərəb Respublikasında uzaqdan idarə edilən bombanın partladılması nəticəsində dörd nəfər rus hərbçi həlak olub. İki nəfər yaralanıb. Rusiyalı həkimlər yaralıların həyatını xilas etmək üçün mübarizə aparırlar".

Qeyd edilir ki, Tiyas aerodromundan Homs şəhəri istiqamətində hərəkət edən Suriya ordusuna məxsus maşın karvanında Rusiya hərbi müşavirlərini aparan avtomobil də olub. Maşın karvanı 4 km məsafə qət etdikdən sonra rusları daşıyan avtomobil uzaqdan idarə edilən qurğu ilə partladılıb.

Qeyd edək ki, 5 fevral tarixində də Latakiya yaxınlığında rus hərbi avtomobili partladılmışdı. Nəticədə 5 nəfər rus hərbçi həlak olmuşdu. Bununla belə, "Əl-Cəzirə" kanalının bu məlumatını Rusiya müdafiə nazirliyinin rəsmi nümayəndəsi general-mayor İqor Konaşenkov təkzib etmişdi.

Hikmət
Ölkə.Az