Bakıda liftsiz göydələn...

Bu bina Bakı şəhərində yerləşir. 16 mərtəbəli nəzərdə tutulmuş, 12 mərtəbəsi tikildikdən sonra əhalisi məskunlaşmış, geridə qalan 4 mərtəbəsinin tikintisinin isə martda davam etdiriləcəyi bildirilən bu binanın sakinlərindən gələn məktubların izi ilə Ölkə.az liftsiz, yarımçıq göydələndə olub.

Xətai rayonu Zığ şossesi 29/51-ci məhəllə Qədir Məmmədov küçəsi 2B nömrəli binanın sakinləri hündürmərtəbəli binada yaşamalarına baxayaraq liftlərinin olmamasından şikayət edirlər.

Məsələdən agah olmaq üçün yuxarıda adı çəkilən ünvana gedirik.

Ünvana yaxınlaşanda aydın olur ki, bina istifadəyə verilməyib. Binanın həyətinə girirk. Gördüyümüz isə bir anlıq bizi şoka salır. Bir cavan xanım bazarlıqdan gəlir. Əlində bir neçə ağır zənbil. Qadın yavaş-yavaş binaya yaxınlaşır və giriş blokunun yan tərəfindəki qaldırıcı qurğuya yaxınlaşaraq əlindəki zəmbilləri qurğunun üstünə qoyaraq qurğunun yanında dayanan yaşlı kişiyə "dayı 11-ci mərtəbəyə qaldır" dedi. Yaşlı kişi qurğunu işə saldı və gənc xanımın zəmbilləri binanın çölü ilə 11-ci mərtəbənin balkonunun bəarabərinə qədər qalxdı. Balkonda qurğunu ev sakinlərindən digəri gözləyirdi. Qurğu 11-ci mərtəbənin bərabərinə çatanda dayandı və balkonda gözləyən zəmbilləri qurğunun üstündən götürərək gözdən itdi.

Bu mənzərəni gördükdən sonra XXI əsrdə yaşamağıma şübhə etməyə başaladım. Yaxınlaşdım qurğunu işlədən ağsaqqalın yanına. Salam-kalamdan sonra məlum oldu ki, kişinin adı Musa dayıdır. Musa kişidən binada liftin niyə olmamasını soruşuruq. Deyir, bina tam hazır deyil. Binadan ev alan adamlar kirayələrə pul çatdıra bilmədiyi üçün gəlib giriblər öz evlərinə. Əslinə qalsa binanın planı hazırlananda 16 mərtəbəli nəzərdə tutlub, ancaq sonradan "Məkan MTK"nın maliyyə problemləri olduğuna görə, bina 12 mərtəbədə dayandırıldı. Bir müddət bundan öncə isə şirkət qərar verdi ki, binanın yarımçıq qalan 4 mərtəbəsini də tiksin. Ona görə də hələlik binaya lift quraşdırılmayıb.

Lift qoyulmamasının digər səbəbi isə "Məkan MTK"nın rəhbəri Hacı Rəşadın borclu bina sakinlərinə dəfələrlə xəbərdarlıq etməsinə baxmayaraq, sakinlərin firmaya olan borcunun hələ də ödənilməməsidir.

Musa dayı onu da bildirdi ki, bu binada yaşayanlardan cəmi bir neçəsi tam şəkildə pulunu ödəyib, yerdə qalanların isə şirkətə küllü miqdarda borcu var. Liftlər alınıb, hazırdır, sadəcə 4 mərtəbənin tikilməsini gözləyirlər.

Söhbətimizə binada bir il yarımdır yaşayan Qara kişi qoşulur. Qara kişi deyir ki, evimin pulunu tam şəkildə ödəmişəm. Çox istəyirik liftimiz işləsin, ancaq bəzi səbəblərdən quraşdırılmır. Qaldırıcı qurğunun ümidünə qalmışıq. İndi də deyirlər 4 mərtəbə tikiləcək. Bina tam hazır olandan sonra lift quraşdırılacaq. Şirkət rəhbərliyi bildirdi ki, mart ayında bina tam hazır olacaq, biz də binanın hazır olmasın gözləyirik.

Binada neçə ailənin yaşadığını soruşuruq. Musa kişi deyir, binada 130 ev var ancaq 60-a yaxın evdə yaşayış var.

Məkan MTK-nın rəhbərliyi ilə görüşmək üçün firmanın ofisinə gəlsək də, buranın bağlı olduğunu görüb geri qayıdırıq. Bina sakinləri bildirir, şirkət rəhbərliyində liftin qoyulmasın tələb edəndə deyirlər ki, bina tam istifadəyə verilməyib. Sual olunur, bina əgər tam istifadəyə verilməyibsə, yaşayış üçün yarasız binada insanların məskunlaşmasına niyə icazə verirsiniz? Bəs insanlar yaşaya-yaşaya 12-ci mərtəbənin üstünə əlavə 4 mərtəbə necə tikəcəksiniz? Bəs təhlükəsizlik, bəs insanların əmlakının təhlükəsizliyinin zəmanəti?

Görünən odur isə odur ki, bina sakinləri mart ayına qədər bu əzabı çəkməli olacaqlar, sonrasını isə nə özləri bilir, nə də tikinti şirkəti...