Fransada məscid yandırıldı

Fransada rasizm meylləri çoxalıb.

Ölkə.Az Fransa mətbuatına istinadən xəbər verir ki, noyabrın 10-da naməlum şəxs Fransa şəhərindəki məscidi yandırıb. Fransanın Strasburq şəhərində yerləşən məscid gecə saatlarında yanıb.

Bildirilir ki, yanğın qısa vaxt ərzində məscidin giriş qapısını, binanın fasad hissəsi və əlavə iki qapısını əhatə edib. Hadisə yerinə cəlb olunan yanğınsöndürənlər alovun daha geniş ərazilərə yayılmasına imkan verməyiblər. Yerli polis nümayəndəsi xalqlar arasında nifaqın yaranmasına səbəb olan bu hadisəni pisləyərək video görüntüsü alınan cinayətkarın tezliklə tapılaraq məhkəmə qarşısında cavab verəcəyini vəd edib. Strasburqdakı məscidin imamı terror aktının son vaxtlar ölkədə etnik və dini qruplara qarşı yayılmaqda olan antisemitizm və rasizm meyllərinin çoxalması ilə əlaqələndirib.

Məlumat üçün bildirək ki, Strasburq – Fransanın şimal-şərqində yerləşən şəhərdir. Bu şəhər Alzas əyalətinin və Aşağı Reyn departamentinin mərkəzidir. Avropa Şurasının mərkəzi orqanları və Avropa Parlamenti məhz Strasburda yerləşir və əhalinin sayına görə Fransanın yeddinci ən böyük şəhəridir.

Rəşid Mustafazadə

Ölkə.Az