“Mehriban Əliyeva Heydər Əliyev irsinin davam etdirilməsi işini yüksək səviyyədə həyata keçirir”
Bu fikirləri “Ölkə.Az”-a açıqlamasında Milli Məclisin deputatı, Yeni Azərbaycan Partiyasının (YAP) Siyasi Şurasının üzvü Aydın Hüseynov bildirib.
Deputat deyib ki, Mehriban Əliyeva Azərbaycan mədəniyyətini, tarixini dünyada yüksək səviyyədə tanıdır və təbliğ edir:
“İndiyədək Azərbaycanda bir sıra mühüm beynəlxalq tədbirlər, idman yarışları, mədəniyyət və humanitar sahələrdə mötəbər tədbirlər təşkil olunub. Buna misal olaraq 2012-ci ildə keçirilən “Eurovision” mahnı müsabiqəsini və 2015-ci ildə baş tutan “Bakı 2015” Avropa Oyunlarını göstərmək olar. Bütün bu tədbirin Təşkilat Komitəsinin sədri məhz Mehriban xanım Əliyeva olub. Onun mükəmməl təşkilatçılıq qabiliyyəti nəticəsində paytaxtımızda bu mühüm tədbirlər yüksək səviyyədə təşkil olunub. Təbii ki, bu da Azərbaycanın dünyada artan nüfuzuna daha da müsbət töhfələr verib”.
A.Hüseynov qeyd edib ki, Mehriban Əliyeva Heydər Əliyev Fondunun prezidenti kimi ulu öndər Heydər Əliyev irsinin davam etdirilməsi işini yüksək səviyyədə həyata keçirir:
“Mehriban Əliyeva “Heydər Əliyev” ordeninə layiq görülüb. O, yüksək intellektual səviyyəli, təcrübəli təşkilatçı olmaqla yanaşı, xeyirxah, humanist insandır. Biz bir neçə dəfə onun Milli Məclisdə Amnistiya Aktının qəbul olunması təşəbbüsü ilə çıxış etməsinin şahidi olmuşuq. Nəticədə minlərlə insan qəbul olunmuş Amnistiya aktlarından yararlanaraq azadlığa qovuşub, neçə-neçə ailə böyük sevinc hissi yaşayıb. Hesab edirəm ki, xalqımızın Mehriban xanım Əliyevaya olan böyük sevgisi də məhz onun belə xeyirxah əməllərindən qaynaqlanır. Tam əminəm ki, Mehriban Əliyeva bundan sonra Azərbaycanın Birinci vitse-prezidenti kimi də ölkəmizin gələcək inkişafına öz layiqli töhfələrini verəcək. Ona çətin və şərəfli işində uğurlar arzu edirəm!”.
Ramal Hüseynli
Ölkə.Az
