"Hazırda Suriyada real aparıcı oyunçu ABŞ yox, Rusiyadır"

Rusiya müdafiə naziri Şoyqu Rakkaya hücum əməliyyatında ABŞ-la əməkdaşlıq etmək istədiklərini bildirib. Buna cavab olaraq isə Pentaqonun nümayəndəsi Mişel Baldantsa deyib ki, ABŞ Rusiya ilə hərbi sahədə əməkdaşlığı hələ bərpa etməyib. ABŞ-ın müdafiə nazirliyi Rusiya hərbi qüvvələri ilə əməkdaşlığı rəsmi Moskvanın Krımın anneksiyası ilə bağlı qanunsuz hərəkətlərindən sonra dayandırıb.

Rusiya uzun müddətdir ki Suriyada Türkiyə və İranla birgə terrorçulara qarşı hərbi əməliyyatlar həyata keçirir. ABŞ isə Rakkaya hücum edəcəyini bəyan edib və bu əməliyyatları Türkiyə ilə birgə həyata keçirmək istədiyini bildirib.

Suriyada ABŞ-Rusiya qarşılaşması və Türkiyənin mövqeyi barədə politoloq İlqar Vəlizadə "Ölkə.Az"-a danışıb:

"Rusiya Suriyada ABŞ-la əməkdaşlığa can atır. Görünür ki, ABŞ bu əməkdaşlığı konkret şərtlərlə həyata keçirmək istəyir. Şərtlər də göz qabağındadır. ABŞ Ukraynada Rusiyanı konkret kompromislərə sürükləyir. Rusiya isə indiki vəziyyətdə bu kompromislərə hazır deyil. Rusiya bu məsələdə güzəştlərə hazır deyilsə, digər məsələlərdə də kompromislərə getmək fikrində deyil. ABŞ çox güman ki, Rusiya ilə əməkdaşlığı böyük kompromislər əsasında qurmaq istəyir. İki dövlət arasında digər məsələlərlə bağlı güzəştlər əldə edilsə, Suriya məsələsi ilə bağlı da müəyyən irəliləyişlər olacaq. Bütün hallarda tərəflər mövqelərini ortaya qoyublar. Ancaq bu o demək deyil ki, bu mövqelər olduğu kimi qalacaq. Ukraynada və yaxud Suriyada real vəziyyət dəyişsə, hər iki tərəf münasibətlərini də dəyişə bilər.

Hazırki mövcud durumda heç bir tərəf kompromisə getmək istəmir. Kompromisə getməmək də vəziyyətin olduğu kimi qalmağına imkan verir".

Türkiyə Rusiya ilə birgə hərbi əməliyyatlar həyata keçirib bir neçə məntəqəni terrorçulardan təmizlədi. İndi isə ABŞ Rakka əməliyyatlarını Türkiyə ilə birgə həyata keçirmək niyyətindədir. ABŞ və Rusiyanın kompromis əldə etmədiyi bir vaxtda Türkiyənin hansı tərəfi seçəcəyi ilə bağlı politoloq bunları dedi:

"Türkiyə hazırda gözləmə mövqeyindədir. Rəsmi Ankara nə Rusiya, nə də ABŞ tərəfə addım atmağa tələsmir. Hazırkı vəziyyət nisbi də olsa Türkiyəni qane edir. Əgər vəziyyət dəyişsə, Türkiyənin maraqları təhlükə ilə üzləşsə onda real aparıcı oyunçu ilə iş görəcək. Hazırda Suriyada real aparıcı oyunçu ABŞ yox, Rusiyadır. Ona görə də, Türkiyə öz planlarını Rusiya ilə koordinasiya edir. Yəqin ki, bu vəziyyət bir müddət davam edəcək. Əgər vəziyyət dəyişərsə, o zaman Türkiyə planlarına yenidən baxacaq".

Səxavət Məmməd
Ölkə.Az