"Reklam təqdimatına gətirilən məhdudiyyətlər bu bazarı çökdürə bilər"

Milli reklam bazarında baş verən son hadisələr onu göstərir ki, ölkədə reklam sahəsində bir neçə ildən sonra ciddi qıtlıq yaşana bilər. Buna dünyaca məhşur “Prokter & Gembl Azərbaycan Servisləri” MMC barəsində şirkətinin cərimələnməsindən nümunə gətirmək olar.

İqtisadiyyat və Sənaye Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən reklam bazarında aparılmış araşdırmalar zamanı “Oral-B Pro-flex” diş fırçasının, “Duracell” batareyasının, “Ariel” yuyucu tozunun və “Blend-a-med Pro-expert” diş məcununun reklamlarında istehlakçıların çaşdırılmasına səbəb olan haqsız və qeyri-dəqiq reklam əlamətləri aşkar edilib. Bununla əlaqədar həmin reklamların sifarişçisi olan “Prokter & Gembl Azərbaycan Servisləri” MMC barəsində antiinhisar qanunvericiliyinin tələblərinin pozulması əlamətləri üzrə iş qaldırılıb.

Ümumilikdə baş verən bu hadisələr ölkədə reklam bazarına nə cür təsir göstərə bilər?

Ölkə.az-ın sualını marketinq üzrə ekspert Ramil Cabbarov cavablandırıb.

"Ümumiyyətlə bu cür addımlar reklam bazarına çox mənfi təsir edib və şirkətlər arasında rəqabət mühitini tam mənada azaldacaq. Şirkətlər müştəri qazanmaq üçün fikir, ideya irəli sürməzdən əvvəl qanunvericiliyi nəzərdən keçirməyə məcbur olacaqlar. Əslində reklam bazarı ümumiyyətlə müstəqil olmalıdır. Digər qabaqcıl ölkələrə nəzər salsaq orada reklam sahasi tam olaraq müstəqildir. Hətta şirkətlərin adlarını çəkərək, bir-birini atmacalı reklamlar vasitəsi ilə müştərilərin gözündə qalxmağa, müştəri məmnunluğu yaratmağa çalışırlar. Dünya təcrübəsində reklam mətninin hazırlanması tam sərbəstdir.

Ölkədə reklam bazarının daralması şirkətlərin Azərbaycan bazarındakı fəaliyyətlərini məhdudlaşdıra bilər. Xüsusi məhsullar ola bilər ki, keyfiyyətini sübut edə bilmədiyinə görə, məhsullarını Azərbaycandan çıxarda bilər. Əgər məhsulu reklam edərkən o olduğu kimi göstərilərsə, bu artıq reklam yox, KSM çarxına çevriləcək".

Qeyd edək ki, istehlakçıları çaşdırmaqla haqsız rəqabətə yol verdiyinə görə “Prokter & Gembl Azərbaycan Servisləri” MMC-yə nə az, nə çox 2 milyon 163 min manat məbləğində maliyyə sanksiyası tətbiq edilib.

Fatimə İbrahimova
Ölkə.az