\"Hər an ABŞ və Rusiya toqquşması ola bilər\"

Tramp bu bəyanatı Rusiya silahlara nəzarət müqaviləsinin şərtlərini pozması ilə əlaqələndirib. Tramp bildirib ki, bu məsələni Rusiya prezidenti Vladimir Putinlə görüşdə də müzakirə edəcək. Tramp həm də bildirib ki, Rusiya ilə nüvə silahının azaldılması mövzusundakı təktərəfli müqavilənin əleyhinədir.

ABŞ-ın nüvə arsenalını artırması heç şübhəsiz Rusiyanı da bu addımı atmağa vadar edəcək. Beləliklə dünyada nüvə silahlarının sayı azalmaq əvəzinə daha da çoxalacaq. Ekspertlər nüvə silahlarının sayının artmasının təhlükəli olduğunu bildirir.

Trampın nüvə bəyanatı və bunun nəticələri barədə politoloq Adıgözəl Məmmədov "Ölkə.Az"-a danışıb:

"Bəziləri Trampı Rusiya kəşfiyyatının qeyri-leqal agenti kimi təqdim edirdi. Dəfələrlə demişəm ki, bu yanlış fikirdir. ABŞ Tramp demək deyil, ABŞ siyasətini Tramp tənzimləmir. Bu məsələlər oturuşmuş dövlət aparatı tərəfindən həyata keçirilir. Trampın son bəyanatı da bunları təsdiq etdi. ABŞ-Rusiya münasibətləri geopolitik güclərin bariz və təbii göstəricisidir. Hər iki dövlət geopolitik gücdür və istər-istəməz bu dövlətlər arasında rəqabət olmalıdır.

Trampın "ABŞ nüvə arsenalını artırmalıdır" bəyanatının arxasında oturuşmuş strateji xəttlər dayanıb. Praktiki olaraq nüvə silahlarının sayı və istehsalı barədə dəqiq müfəssəl məlumat yoxdur. Bəzi mənbələrin sözünə görə, tərəflər bu razılaşmaya məhəl qoymurlar. Buna nəzarət etmək də mümkün deyil. Hansı dövlətin nə istehsal etdiyini bilmək olmur. Bu tip silahlar qapalı strukturlarda, məkanlarda istehsal edilir.

Artıq tərəflər arasında gərginlik yaranıb. Bu, geopolitik toqquşmalardır. Bu günə qədər Trampdan qəhrəman düzəldənlər artıq Rusiya mediasında Trampı kloun kimi qələmə verirlər. Başa düüşmürlər ki, bütün bəyantların arxasında strateji məsələlər var və bu siyasətdən də kənara çıxmaq mümkün deyil. Trampın atdığı bütün addımlar Mərkəzi Kəşfiyyat idarəsinin nəzarəti altındadır".

Trampın məlum bəyanatının nələrlə nəticələnəcəyi məsələsinə gəldikdə isə politoloq bildirdi ki, faktiki olaraq bu bəyanat dünyada nüvə başlıqlarının sayını artıracaq:

"Yeni mərkəzləşmələr formalaşacaq. Yeni nəqliyyat yolları üzərində mübarizə artacaq. Orta Şərqdə vəziyyət olduqca kəskinləşəcək. Ziddiyyətlər Koreya və Hind-Çin yarmadasında da özünü büruzə verəcək. Bu hadisə Latın Amerikasında da vəziyyətin kəskinləşməsi ilə nəticələnəcək. Çox təəssüf ki, məsələ bizim coğrafiyaya da öz təsirini göstərəcək. Faktiki olaraq tərəflər hazır vəziyyətdə dayanıb. Hər an hər şey ola bilər".

Səxavət Məmməd
Ölkə.Az