\"Bir neçə ildir ki, lokal müharibə gedir\"

Adətən cəbhədə gərginlik artan kimi ATƏT-in Minsk qrupu, Rusiya tərəfi atəşkəsi bərpa etməyə çağırırdı. Ancaq bu dəfə heç bir tərəf baş verənlərlə bağlı fikir səsləndirmir.

Cəbhədən isə hər gün döyüş xəbərləri gəlir. Azərbaycan tərəfi 5 şəhidinin qarşılığı olaraq düşmənin tankını, dayaq məntəqələrinin qərargahını, PUA-sını vurub sıradan çıxardıb.

Cəbhədə baş verən gərginlik və Minsk qrupunun susqunluğu barədə politoloq İlqar Vəlizadə Ölkə.Az-a danışıb:

"Düşünürəm ki, bir neçə ildir ki, lokal müharibə gedir. Lokal müharibənin göstəriciləri ondan ibarətdir ki, hər gün atəşkəs rejiminin dəfələrlə pozulması barədə xəbər alırıq. Bu reallıqdır, bir neçə ildir ki, lokal xarakterli müharibə gedir. Bir neçə il öncəki arxiv materiallarına baxsaq görərik ki, o dövrdə də atəşkəs pozulur, ölənlər, yaralananlar olurdu. Bu göstəricilər müharibənin getdiyini göstərir.

Baş verən müharibə ayrı-ayrı vaxtlarda daha da gərginləşib. 2014-cü ilin avqust ayında, ötən ilin aprel ayının əvvəlində cəbhədə gərginlik artdı, hərbi əməliyyatlar keçirildi. İndi də cəbhədə gərginlik var. Hər iki tərəf itki verir".

Adətən cəbhədə gərginlik olan kimi ATƏT-in Minsk qrupu və Rusiya dərhal reaksiya verirdi, ancaq cəbhədə son baş verənlərlə bağlı hər iki tərəf susdu. Bununla bağlı politoloq bildirdi ki, artıq hər iki tərəf hər gərginlikdə dərhal reaksiya verməyin gülünc olduğunu başa düşür:

"ATƏT-in Minsk qrupu çalışır ki, atəşkəs rejimini möhkəmləndirmək üçün müəyyən tədbirlər görsün. Bu məqsədlə müşahidəçilərin sayı artırılmalı, cəbhə xəttində xüsusi qurğular quraşdırılmalıdır. Buna səbəb də atəşkəsi kimin pozduğunu müəyyən etməkdir. Bu məsələləri danışıqlar prosesinə daxil ediblər. Danışıqlar prosesində bu məsələni müzakirə etmək üçün şərait, əsas yaradılmalıdır. Bu şərait, əsas isə Minsk qrupu tərəfindən yaradılmır. Bunun ermənilərin istəyi ilə edilməsi qeyri-konstruktivdir. Azərbaycan tərəfinin maraqlarını nəzərə almadan bunun həyata keçirilməsi yolverilməzdir. Azərbaycan tərəfi bu cür təklifləri rədd edir. Ona görə də, vəziyət dəyişilmir.

Görünən odur ki, gərginlik artır. Bundan istifadə edən Minsk qrupu isə bu məsələni gündəliyinə salıb. Azərbaycan tərəfi deyir ki, bu məsələyə kompleks şəkildə baxmaq lazımdır. Bu məsələ Azərbaycan torpaqlarının işğaldan azad edilməsi ilə əsaslandırılmalıdır. Eyni zamanda da qaçqınların öz torpaqlarına qayıtması ilə əlaqələndirilməlidir. Bu iki məsələ Minsk qrupu tərəfindən qəbul edilmir.

Minsk qrupunun həmsədrləri ermənilərin güdazına gedirlər. Ermənilərin mövqeyi ilə şərik olurlar. Ona görə də, həm danışıqlar prosesində müsbət nəticə görmürük, həm də cəbhə xəttində sabitliyə doğru proses müşahidə olunmur".

Səxavət Məmməd
Ölkə.Az