Azərbaycanda daha bir idman assosiasiyası yaradıldı

Ölkə.Az-ın məlumatına görə, yeni idman təşkilatının-Azərbaycan Futnet Assosiasiyasının (AFNA) təqdimat mərasimi keçirilib. Bir sıra idman federasiyalarının rəhbərlərinin, dövlət rəsmilərinin iştirak etdiyi tədbirdə əvvəlcə qurumun rəhbər vəzifələrinə keçirilən seçkilərin nəticələri açıqlanıb. 
Vüqar Xəlilov assosiasiyanın prezidenti, Samir Məmmədov birinci, Rüfət Hüseynov isə vitse-prezident seçiliblər. Tanınmış hakim Əfqan Həmzəyev qurumun baş katibi olub. 

Əli Əliyev, Gülağa Cabbarov, Aydın Məmmədov, Aydın Hüseynov, Kamal Məmmədov və Elçin Məmmədov isə assosiasiyanın üzvləri seçiliblər.  
Rusiya Futvolley Federasiyası, Avropa Futvolley Federasiyası və Rusiya Futnet Federasiyasının nümayəndələrinin iştirak etdiyi yığıncaqda bildirilib ki, futbol-tennis idman növü 1922-ci ildə Çexoslovakiyada yaranıb. Həmin illərdə Praqanın “Slaviya” klubunun nəzdində ayaqla oynanılan tennis üzrə komanda fəaliyyətə başlayıb. İdmanın bu növü üzrə ilk turnir 1939-cu ildə keçirilib. Bu yarışlar əsasən, Çexoslovakiya ərazisində təşkil olunub. 1940-cı ildə futnet üzrə müəyyən qaydalar qəbul olunub. 1943-cü ildən idmanın bu növü Fransada geniş yayılmağa başlayıb. 1953-1961-ci illərdə Avropada on komandanın iştirakı ilə liqa yarışları keçirilib. 1971-ci ildə Çex Futnet Dərnəyi yaranıb, üç il sonra isə Slovakiya Futnet Assosiasiyası qeydə alınıb. 1987-ci ildə İsveç, İngiltərə, İtaliya, Rumıniya və Almaniyanın iştirakı ilə Beynəlxalq Futnet Assosiasiyası təsis edilib. 1991-ci ildə idmanın bu növü üzrə ilk Avropa, üç il sonra isə birinci dünya çempionatı keçirilib. 2010-cu il aprelin 24-də isə Avropa Futnet Birliyi fəaliyyətə başlayıb.

Vurğulanıb ki, sovet dövründə Azərbaycanda futnet idman növünə oxşar oyunlar keçirilib. Peşəkar futnet komandası isə ilk dəfə ötən il “Marafon” idman klubunun nəzdində fəaliyyətə başlayıb. İdmançılarımız ilk dəfə beynəlxalq turnirdə məhz həmin il mübarizə aparıblar. Azərbaycan Şimali Kiprdə keçirilən dünya çempionatında təmsil olunub. Azərbaycanlı hakim Əfqan Həmzəyev 2014-2016-cı illərdə Türkiyədə və Rumıniyada keçirilən beynəlxalq turnirlərdə iştirak edib. Azərbaycanda ilk futnet yarışı da 2016-cı ilin iyununda keçirilib. Rusiya, Azərbaycan və Gürcüstan komandalarının iştirakı ilə Bakıda keçirilən ilk beynəlxalq yarış ötən il dünyada təşkil edilən ən reytinqli beş turnirdən biri olub.

Sonda jurnalistlərin sualları cavablandırılıb.

İntiqam VALEHOĞLU
Fotolar: Nurlan Gülməmmədov
Ölkə.Az