Ekspert: "Ermənilər layiq olduqları cavabı aldılar"

Ağdam rayonu istiqamətində Ermənistan Respublikasının Hərbi Hava Qüvvələrinə məxsus iki Mi-24 tipli döyüş helikopteri müdafiənin ön xəttində yerləşən mövqelərimizə hücum edərək onları atəşə tutublar. Cavab atəşilə düşmənin döyüş helikopterlərindən biri vurulub, digəri isə atəş zonasını tərk etmək məcburiyyətində qalıb.

Helikopterin vurulması və bundan sonra qoşunların təmas xəttində baş verə biləcək mümkün hadisələri Ölkə.az-a hərbi ekspert Üzeyir Cəfərov şərh etdi:

Üzeyir Cəfərov: "Helikopterin vurulmasından sonra nələrin baş verəcəyini praqnozlaşdırmaq çətindir. Ancaq bundan sonra ermənilər çətin ki, belə bir ağılsızlıq etsinlər. Bu dəfə onların etdiyi hərəkət Azərbaycan əsgərinin əsəblərini tarıma çəkdi və əsgərlərimiz də onlara lazımı cavabı verdilər. Düşmənin istənilən hədəfi bizim mövqelərə təhlükə yaradarsa, onların cavabını vermək əsgərlərimiz borcludur. Əsgərlərimiz hansısa təhlükənin kritik ana keçməsini gözləməməlidir. Erməni döyüş maşınlarının mövqelərimizin iki addımlığında görülməsi özü təhlükə idi və nəticəsini də gördülər. Müddətdən artıq xidmət keçən İlkin Muradov öz vəzifə borcunu layiqi ilə yerinə yetirib.

Helikopterin vurulması anının video görüntüsü ilə bağlı çox söz söhbətlər yayılıb, bununla bağlı heç bir narahatçılıq yoxdur, əksinə o videonun özü də bir daha onu deməyə əsas verir ki, Azərbaycan öz ərazisində düşmən hərbi maşınını məhv edib. Ermənilər dünəndən çaşqın vəziyətdədirlər. Əvvəl dedilər ki, vurulmuş helikopter "Dağlıq Qarabağ" respubilkasına aiddir, ancaq sonradan etiraf etdilər ki, helikopter Ermənistan ordusuna məxsus olub. Helikopterdə ölənlərin hər üçü Ermənistan ordusunun zabitləridir.
Helikopterin vurulmasından sonra təbii ki, gərginlik olacaq. Eyforiyaya da qapılmaq lazım deyil, düşmən hər zaman düşməndir. Komandanlıq yəqin ki, lazım olan göstərişləri verib. Mütləq diqqəti artırmaq lazımdır. Ermənistan höküməti öz daxili auditoriyasını sakitləşdirmək üçün, vəziyyəti balanslaşdırmaq üçün, istər-istəməz çalışacaq ki, bizə müəyyən zərbələr endirsin.

Ermənilər dəfələrlə bu cür həyasızlıq ediblər və bu dəfə layiq olduqları cavablarını alıblar. Erməni helikopteri birbaşa təmas xəttini keçib bizim postların üzəri ilə uçub, bunun isə ağır nəticələri ola bilərdi. Ona görə də, bizim əsgərlərimiz haqlı olaraq o helikopteri vurublar. Ancaq hesab edirəm ki, helikopterlərdən birinin vurulması da kifayətdir. İkinci helikopteri də vurmaq olardı, ancaq kadrlardan göründüyü kimi ikinci helikopter birinci vurulandan sonra həm sürətin artırdı, həm də nəzarətlərində olan əraziyə doğru yönəldi. İkinci helikopter vurulsa idi ermənilər bundan istifadə edib, deyəcəkilər ki, bizim nəzarətimizdə olan ərazidə helikopterimizi vurdular".

Vurulan helikopterdə ölən 3 erməni zabitinin meyitinin çıxarılıb çıxarılmaması haqda hələlik heç bir məlumat yoxdur. Məlumata görə erməni tərəfi Azərbaycana meyitlərin götürülməsi üçün şərait yaradılması haqda müraciət ediblər, ancaq hal-hazırda bu məsələ öz həllini tapmayıb".

Səxavət Məmməd
Ölkə.az