"Azərbaycan ərazisinə soxulan istənilən hərbi obyekt məhv edilməlidir"

Azərbaycan ordusunun Ağdamda erməni helikopterini vurmasına müxalif partiya liderləri münasibət bildirib.

Ölkə.az-a açıqlamasında Böyük Quruluş partiyasının lideri Fazil Mustafa, Ümid partiyasının lideri İqbal Ağazadə, Azərbaycan Sosial Demokrat partiyasının lideri Araz Əlizadə, Müasir Müsavat partiyasının lideri Hafiz Hacıyev ordumuzun erməni helikopterini vurmasına müsbət qarşılayıblar.

Fazil Mustafa: "Biz müharibə şəraitindəyik. Azərbaycan ərazisinin, Dağlıq Qarabağın hüdudlarında olan istənilən düşmən obyektini Azərbaycan ordusu zərərsizləşdirməlidir. Biz Ermənistanın ərazisində bunu etməmişik, sırf Azrbaycan ərazisində olduğuna görə, ordumuza haqq qazandırıram . Hesab edirəm ki, ordumuz istənilən erməni provikasiyasına da hazır olmalıdır. Onların hücumlarının qarşısını almalıdır".

İqbal Ağazadə: "Bilirsiniz, helikopterin vurulması çox normal bir şeydir. Atəşkəs rejimi olmasına baxmayaraq Azərbaycanın hava məkanı pozulubsa, ölkənin sərhətlərində işğal olunmuş hətta ərazilərdə belə qeyri-qanuni uçuşlar həyata keçirilirsə, təbii ki, Azərbaycan tərəfi buna öz münasibətlərini bildirməlidir, çünki sonra bundan vətəndaşlar əziyyət çəkir. Hərbi helikopterin hansı əməliyyatlar keçirilməsini heç kim sığortalaya bilməz ki, o test uçuşu həyata keçirirdi, yoxsa hər hansısa ərazini bombalayacaqdı. Bununla bağlı heç bir zəmanət yoxdur. Azərbaycana kim təminat verə bilərdi ki, bu iki helikopter hər hansısa yaşayış məntəqəsini bonbalamayacaqdı və orada çoxlu sayda dinc sakinlər ölməyəcəkdi? Ona görə də, heç kəs Azərbaycanı hansısa qanunları pozmaqda ittiham edə bilməz və bu olduqca düzgün addım idi".

Araz Əlizadə: "Azərbaycan ərazisində hər hansısa bir ölkənin hərbi helikopteri olsun, qırıcıcısı olsun, istəyir əsgəri olsun biz onların hamısının vurulmasının tərəfdarıyıq".

Hafiz Hacıyev: "Mən bunu böyük bir uğur hesab edirəm. Bu onu göstərir ki, Azərbaycanın qüdrətli ordusu var. Azərbaycan ordusu gücünü göstərmək üçün bir helikopteri yox, hücuma keçib Xankəndinidə geri qaytarmalıdır. Partiya sədri olmağıma baxmayarq döyüşdə iştirak etməyə hazıram. Şəxsən mən dəfələrlə demişəm, minlərlə partiya üzvü ilə döyüşə gedəcəyik. Erməni işğalçılarından öz torpaqlarımızı geri qaytaraq, Avropanın, ATƏT-in ikiüzlü siyasətinə bir dəfəlik yox deyək. Öz dədə babalarının qəbrini ziyarətə gedən insanları tutub Xankəndində qeyri qanuni qrum məhkəmə açmasına nə Avropa, nə ATƏT, nə də Amerika heç bir reaksiya vermir. Hücuma keçib öz torpaqlarımızı azad etməyin vaxtıdır. Buna Qərb nə deyəcək, ABŞ nə deyəcək, ATƏT nə deyəcək bizim üçün maraqlı deyil. Mən partiya sədri olaraq bu məsələlərdə dövlətimin yanındayam".

Səxavət Məmməd
Ölkə.az