"Çox təəssüf edirəm ki, XİN və Müdafiə Nazirliyi buna sərt təpki göstərməyib"

Millət vəkilləri türk kanallarında helikopterin vurulması ilə bağlı yayımlanan yanlış ifadəyə münasibət bildiriblər.

İqbal Ağazadə: "Ümumiyyətlə təkcə türk kanalları deyil, CNN, Euronews da bu xəbərləri eyni tipdə verib. Çox təəssüf edirəm ki, Xarici İşlər Nazirliyi və Müdafiə Nazirliyi buna sərt təpki göstərməyib. Ən azı ifadənin özü beynəlxalq hüquq normalarına ziddir. Hətta Dağlıq Qarabağı tanınmamış, və yaxud da separatçı rejim kimi də təqdim etməyiblər. Hesab edirəm ki, bu məsələdə XİN və bütövlükdə ictimaiyyət öz diqqətini ayırmalı və nəticə etibari ilə gələcəkdə bu tipli məlumatların getməsini indidən əngəlləməlidir. Bu bir yanlışlıqdır və bütün ölkə bu yanlışlığı aradan qaldırmaq üçün səfərbər olmalıdır".

Fazil Mustafa: "Gərək bizim təbliğat vasitələrimiz bildirsin ki, erməni separatçılarının helikopteri vurulub. Bunu Ermənistanın adı ilə gündəmə gətirilməsi bizim tərəfimizdən də doğru səsləniş deyil. Mən də o fikirdəyəm ki, Dağlıq Qarabağa aid olan separatçıların helikopteri vurulub. Bu cür ifadə daha yerində səslənir. Biz Ermənistan qüvvələri deyəndə bu Ermənistana müəyyən dərəcədə əsas verir ki, müəyyən addımlar atsın, bəhanələr etsin. Ona görə də, biz daha çox Dağlıq Qarabağdakı separatçı, terrorçu rejimin fəaliyyətini zərərsizləşdirməliyik".

Qeyd edək ki, bir neçə türk kanalı, həmçinin "CNN Türk", "Euronews" da erməni helikopterinin vurulması ilə bağlı yayımlanan xəbərdə "Azərbaycan Dağlıq Qarabağ ordusuna aid hərbi helikopteri vurub" deyərək yanlış ifadə işlədib.

Fatimə İbrahimova
Ölkə.az