Suriyada ərəb tayfalarının birdən “ayılması” nədən xəbər verir?

Ərəb tayfaları PYD, PKK və İŞİD-ə qarşı yeni ordu quracaq. Suriyada PKK, PYD və İŞİD tərəfindən torpaqları işğal edilən ərəb tayfalarının liderləri hərbi və siyasi bir ittifaq qurmaq üçün hərəkətə keçiblər.

Suriyanın Rakka, Haseke və Deyr əz-Zor bölgələrində yaşayan 50 ərəb tayfasının lideri "Harran" otelində görüşüb. Toplantı "Əl Cəzirə və Fərat bölgəsi suriyalı tayfalar və qəbilələr baş qurultayı" adı altında keçirilib. Görüşün mövzusu "birlikdə Əsəd-rus-İran, Hizbullah, İŞİD və PYD işğalını bitirmək üçün güclərimizi birləşdirək" olub. Görüş iştirakçılarının məqsədinin Suriyada Əl Cəzirə və Fərat bölgələrini terror qruplaşmalarından təmizləmək üçün "Əl Cəzirə və Fərat tayfalarının ordusu"nu qurmaq olduğu bildirilir. Rejim ordusundan ayrılan zabitlər və Azad Suriya Ordusunun komandirləri yeni hərbi birləşməni idarə edəcək.

Siyasi ekspertlər hesab edirlər ki, Suriyada mövcud ərəb tayfalarının birdən birə meydana atılması qəribə və məkirli xarakter daşıyır. Politoloq Qabil Hüseynli Ölkə.Az-a açıqlamasında bildirib ki, Suriyada neçə ildə baş verən müharibələrdə ərəb tayfaları nədənsə gözə çarpmırdılar. Onun sözlərinə görə, tayfaların meydana çıxmaları propaqanda təsiri bağışlayır.

“Artıq 4 ildir çoxdur ki, Suriyada müharibə gedir. Bu tayfaların 4 ildən sonra birdənbirə yaranması müəyyən çaşqınlıq yaradır. Ola bilsin Rusiyanın təşkili ilə Azad Suriya Ordusuna alternativ kimi istifadə etmək istəyirlər. Əgər həmin qüvvələr Bəşər Əsəd rejiminin təsiri altında olacaqlarsa, Suriyada vətəndaş müharibəsi daha da kəskinləşəcək. Əgər onlar Azad Suriya Ordusu ilə birgə İŞİD-ə və digər terrorçulara qarşı mübarizə aparacaqlarsa, bunun nəticəsi daha effektli ola bilər. Əgər Azad Suriya Ordusunun məsələ ilə əlaqəsi varsa, demək Türkiyənin də məsələdə rolu böyükdür. Bu Suriyada iç barışa, daxili sülhün yaranmasına da kömək edə bilər”, - deyə Qabil Hüseynli bildirib.

Ziya Səccad
Ölkə.Az