“Madrid planı”nın müəmmalı taleyi və Sarkisyanın arzusu

“Ölkə.Az” xəbər verir ki, bu barədə politoloq Elxan Şahinoğlu bildirib. Onun sözlərinə görə,  buna bir başqa planı da qoşmuşdular: “Genişləndirilmiş Madrid planı”. 

“Yəni plana kiçik əlavələr edilmişdi. İndi nə birinci, nə də ikinci plan müzakirə olunur. ATƏT-in Minsk Qrupu həmsədrləri bu həftə Bakıda idilər, prezident İlham Əliyevlə də görüşdülər. “Madrid planı”nın adını çəkən olmadı. Halbuki, bu planı elə həmsədrlər hazırlayıb və bir neçə il həmin plan Bakı və İrəvanla müzakirə olunub. Buna baxmayaraq, həmsədrlər hər dəfə bölgəyə gələndə müzakirələri sıfırdan başlamırlar, hər halda həllin ümumi bazisi var”, - deyə Elxan Şahinoğlu bildirib.

Politoloq deyir ki, Qarabağ mövzusu başqa iki görüşdə də müzakirə edildi və hər iki görüş Moskvada oldu:

“Birinci görüş martın 10-da baş verdi. Türkiyənin prezidenti Rəcəb Təyyub Ərdoğan Moskvada rusiyalı həmkarı Vladimir Putinlə görüşdə Qarabağdan da danışdı. Bu mövzunun gümdəmə gətirilməsinin təşəbbüskarı həmişə kimi Türkiyə tərəfi idi. Bu iki dövlət başçısının təyyarə böhranından sonra dördüncü görüşü idi. Ərdoğanla Putin Moskvada daha çox Suriyadakı vəziyyəti müzakirə etdilər. Bu gözlənilən idi. Buna baxmayaraq, Ərdoğan Putinlə görüşdə Azərbaycana aid iki mövzunu da gündəmə gətirməsi bizim üçün önəmli idi. Ərdoğan birinci cümləsində dedi ki, Dağlıq Qarabağ münaqişəsini qısa müddətdə həll etmək lazımdır, əks halda bölgədə müharibə təhlükəsi qalacaq. Ərdoğan ikinci cümləsində isə Türkiyə-Rusiya-Azərbaycan formatının yaradılmasını təklif etdi. Ərdoğanın Azərbaycana aid mövzuları Putinin diqqətinə çatdırması rəsmi Bakı tərəfindən yüksək qiymətləndirildi. Kreml Ərdoğanın təklifi ilə Türkiyə-Rusiya-Azərbaycan formatının yaradılmasına müsbət yanaşsa da, Dağlıq Qarabağ münaqişəsinin ədalətli həllini sürətləndirməyi planladırmır.

İkinci görüş martın 15-də baş verdi. Ərdoğanın ardından Ermənistan prezidenti də Moskvaya gedərək Rusiya prezidenti Vladimir Putinlə görüşdü. Görüş iki ölkə arasında diplomatik münasibətlərin qurulmasının 25 illiyinə həsr olunsa da, prezidentlər Qarabağ münaqişəsindən də danışdılar. Prezidentlərin görüşündən başqa iki ölkənin hərbçiləri də görüşdü. Rusiyanın baş qərargah rəisi Valeriy Gerasimov Ermənistanın baş qərargah rəisi Movses Akopyanla iki ölkə arasındakı hərbi əməkdaşlıq məsələlərini müzakirə etdi”.

Elxan Şahinoğlunun fikrincə, Serj Sərkisyanın Moskvaya səfərindən əsas məqsədi atəşkəsə riayət olunacağına dair Moskvadan təminat almaqdır:

“Sərkisyan istəyir ki, Kreml aprel ayında Azərbaycana hücuma keçməyə imkan verməsin, Bakıya təzyiqini artırsın və o bu vəziyyətdə seçkini “planlaşdırdığı” kimi keçirsin”. 

Ziya Səccad
Ölkə.Az