Vendetta maskalı şəxslər G-20-yə etiraz edir

Avstraliyada etirazlar səngimir.

Ölkə.Az Brisbane Times nəşrinə istinadən xəbər verir ki, "Böyük iyirmiliyin" (G-20) Avstraliyanın Brisben şəhərində keçirilən sammitinə qarşı etirazlar davam edir.

Bildirilir ki, etirazlar zamanı artıq iki qadın saxlanılıb. Polislərin iddiasına görə, qadınların üzərindən bir ədəd əleyhqaz və Leatherman şirkətinin istehsalı olan bıçaq tapılmışdı. Polis şöbəsinə aparılan qadınlardan birində üç metrə uzunluqda, ağ-qara rəngdə və üzərində «Anti-Fascist Action» yazısı olan bayraq aşkar edib.

Brisben şəhərinin Roma küçəsində "Böyük iyirmilik" əleyhinə irimiqyaslı etiraz aksiyası keçirilib. Antiqlobalistlərin aksiyasında 500-dən artıq şəxs iştirak edib və onların çoxu Qay Foksun məşhur Vendetta maskasını taxıblar. Etirazda 2000-dən çox adamın iştirak edəcəyi gözlənilirdi.

Xatırladaq ki, bir müddət öncə avstraliyalılar iqlim dəyişikliyi sahəsində dövlətin siyasətinə qarşı etiraz əlaməti olaraq başlarını quma basdırmışdılar.
Bu etiraz aksiyasına Avstraliyanın Bondi şəhərinin çimərliyində 400-dən çox insan qatılmışdı. Hökumətin siyasətinə etiraz edənlər arasında valideynlər və məktəblilər, həmçinin işgüzar kostyumlarda olan işçilər də olmuşdu.

Qeyd edək ki, "Böyük iyirmiliyin" sammiti Avstraliyanın Brisben şəhərində 15-16 tarixlərində keçirilir.

Rəşid Mustafazadə

Ölkə.Az