Mahmud Qurbanov iddialı danışdı

"Xorvatiya və İtaliyaya məğlubiyyətdən sonra yenidən evdə oynayacağıq. Norveç millisinin nə qədər çətin və güclü rəqib olduğunu anlayırıq. Sabah yaxşı oyun göstərərək, uğurlu nəticəyə ümid edirik. Futbolçulara inamımız çoxdu. Sabahkı oyunda onlardan çox şey gözləyirik". 

Bu sözləri milli komandamıza rəhbərlik edən Mahmud Qurbanov deyib.

Sabah Norveçlə qarşılaşacaq yığmanın çalışdırıcısı bu gün mətbuat konfransı keçirib. Qurbanov sabah qələbə qazanacaqları halda millidəki işini davam etdirib-etdirməycəyi ilə bağlı suala belə cavab verib: "İndidən bunu demək tezdi. Sabahkı oyunda qələbə qazanmaq istəyirik. Məndə olan məlumata görə, baş məşqçi axtarılır. Mən bu oyunu təkcə öz adıma yazmazdım. Məndə heç zaman arxayınşçılıq olmayıb. Millinin başında olmaq böyük məsuliyyətdi. Bu məsuliyyət ağırdı. Yığmanın məşqçisi kimi qələbə qazanmaq istəyirik".

Baş məşqçi əvəzi sol cinah müdafiəçilərindən Elnur Allahverdiyevlə Ufuk Budaka dəvət göndərməməsinin səbəbindən danışıb: "Sol cinahda Maksim Medvedev də, Tərlan Quliyev də oynaya bilər. Kimin çıxış edəcəyi sabah bilinəcək. Bu cinahda bir problem görmürəm".

Qurbanov milliləşdirilmiş legionerlərin əksəriyyətini yığmaya çağırmamasının da səbəbini açıqlayıb: "Səbəb oyunları ilə bağlıdı. Bir müddət yığmaya dəvət aldılar və zəif təsir bağışladılar. Üzdə olan futbolçulara güvənmişik və çağırmışıq. Ola bilər ki, gələcəkdə çağıraq".

Gənc mütəxəssis norveçli jurnalistin "Azərbaycan "Eurovision"la, yoxsa, milli komandası ilə məşurdu" sualına belə cavab verib: "Sabah sübut edəcəyik ki, Azərbaycan futbolu ilə məşhurdur". (anspress)

Ölkə.Az