Alyaskada çay kənarında tənha yaşayan ailə

"Ölkə.Az" xəbər verir ki, Atçley ailəsi 400 kilometr uzunluğu olan Noutina çayının kənarında yaşayan yeganə insan qrupudur. Ən yaxın qəsəbəyə 160 km-lik məsafədə yaşayan ailəni 18 il ərzində cəmi bir neçə nəfər ziyarət edib. Fotoqraf Ed Qold isə ailə ilə birlikdə 11 ay yaşayıb.

Atçley ailəsi ildə bir dəfə marketdən alış-veriş edir. Ailə marketdən süd tozundan tutmuş, tomat pastası, düyü, qarğıdalı və lobyaya qədər hər şey alır. Bundan başqa ailə ayı, canavar, dovşan, ördək və qunduz ovlayır, yabanı meyvələrdən mürəbbə hazırlayır.

Ailənin pul ehtiyacı vurulmuş heyvanların dərisinin satılması və ya 1.600 km uzaqlıqda yerləşən qızıl mədənində işləməklə ödənilir. Ailənin bir illik xərci 12 min dollardır.

Atçley ailəsinin 13 yaşlı oğlu Skay evdə təhsil alır. Onun təhsili əsasən aşbazlıq, dülgərlik və riyaziyyat üzrədir.

Skayın yeganə dostu təyyarə ilə 75 dəqiqəlik məsafədə yerləşən Feyrbanks qəsəbəsində yaşayan Elladır.

Atçley ailəsinin yaşadığı əraziyə ən yaxın qəsəbə Rubidir və buraya yayda qayıq, qışda isə mühərrikli xizəklə səyahət etmək mümkündür. Ailəyə yaxınlıqda yerləşən xəstəxanaya isə 6 saat yol getmək lazımdır.

Hikmət
Ölkə.Az