"Bu gün dünyanın taleyi ABŞ və Rusiyadan asılıdır"

ABŞ-ın Suriyanın hərbi bazasına raket zərbəsi endirməsi və Rusiyanın "bunu cavabsız qoymayacağıq" bəyanatı, iki ölkə arasında hərbi əməliyyatların keçirilməsi kimi qiymətləndirilirdi.

ABŞ-ın müdafiə naziri Ceyms Mettis yaranmış vəziyyətlə bağlı bildirib ki, Rusiya və ABŞ arasında hərbi münaqişə mümkünsüzdür. Ceyms Mettis əlavə olaraq deyib ki, Rusiyanın ABŞ-ın Suriya obyektlərinə endirəcəyi yeni zərbələrə cavab verəcəyik deməsini təhlükə kimi görmürlər. Rusiyanın ABŞ-la müharibə etməsi rəsmi Moskvanın maraqlarına cavab vermir.

Gərgin olan ABŞ və Rusiya münasibətləri barədə hərbi ekspert Üzeyir Cəfərov Ölkə.Az-a danışıb:

"Heç kimə sirr deyil ki, bu gün dünyanın taleyi ABŞ-la Rusiyadan asılıdır. Çünki hər iki dövlət nüvə dövlətidir və onlar bir-biri ilə nə qədər gərgin münasibətdə olsalar da, hər iki dövlətin dünyaya görə böyük məsuliyyət daşıdıqlarını başa düşürlər.

Suriya ilə bağlı ABŞ-ın sərgilədiyi mövqe boş mövqe deyildi. Artıq Rusiyada da, ABŞ-da da başa düşürlər ki, Suriyaya vurulan ən böyük zərbə Suriyanın dağıdılması oldu. Bəşər Əsədə görə bir zamanlar dünyanın ən görməli ölkələrindən biri olan Suriya hal-hazırda dağılmış vəziyyətdədir. Bunun da məsuliyyəti birinci növbədə Rusiyanın üzərinə düşür. Çünki Bəşər Əsəddən əvvəl onun atası Hafiz Əsədin dövründə SSRİ Suriyadan bəhrələnirdi. Hafiz Əsəd SSRİ üçün şərait yaratmışdı ki, Suriyada hərbi baza qursun. Bunun da nəticəsidir ki, Bəşər Əsəd hakimiyyətdən iki əlli yapışıb qalıb.

ABŞ-ın müdafiə nazirinin fikri açıq şəkildə ona yönəlib ki, biz Rusiya ilə hər hansısa qarşıdurmaya getmək istəmirik. Rusiya özü də bilir ki, ABŞ sıradan bir dövlət deyil, onun imkanları kifayət qədər ciddidir. Rusiya elə başa düşürdü ki, Donald Tramp rəsmi Moskvaya qarşı yumşaq münasibət göstərəcək, ancaq indi Donald Trampın Rusiyanın düşündüyü siyasəti həyata keçirməyəcəyini hiss elədilər.

Rusiya ilə ABŞ arasında qarşıdurma onsuz da hər zaman olub, olacaq. Çünki bir sıra maraqlar var və o maraqları təmin etmək üçün Putin və Tramp çalışır. ABŞ-ın indiki administrasiyası özünü bir qədər ötkəm aparır. ABŞ və Rusiya arasında gərginlik nə Rusiyaya, nə də ABŞ-a sərf edir".

Səxavət Məmməd
Ölkə.Az