Sergey Lavrov: “ABŞ ilə Rusiyanın dostluğu dünyanın uğurudur”

"Ölkə.Az" xəbər verir ki, bu barədə ABŞ-ın dövlət katibi Reks Tillersonun Moskva səfəri çərçivəsində aparılan danışıqlardan sonra Rusiyanın xarici işlər naziri Sergey Lavrov bildirib. Nazir jurnalistlərə açıqlamasında bildirib ki, ABŞ və Rusiya terrorçulara heç bir güzəştə getməyəcək.

“Biz qarşılıqlı razılıq əsasında qərara gəldik ki, terrorçularla mübarizə sahəsində heç bir güzəştə yol verməyək. Bu barədə hər iki dövlətin prezidenti dəfələrlə telefon danışıqları zamanı birmənalı olaraq deyiblər. Hətta sonuncu dəfə ABŞ-ın 45-ci prezidenti Donald Tramp aprelin 4-də Putinə zəng vuraraq, terrorla bağlı başsağlığı verərkən də bir daha deyib”, - deyə Lavrov bildirib.

Rusiyalı nazir deyib ki, hər iki dövlətin qarşılıqlı əməkdaşlığı bütün dünyanın xeyrinə olar: “Terrora dəstək verən qüvvələr bizim münasibətlərimizə maneə olmaq istəyirlər. Moskva və Vaşinqton əməkdaşlıq edəndə bundan nəinki xalqlarımız, bütün dünya udur".

Qeyd edək ki, ABŞ-ın dövlət katibi Reks Tillerson Rusiya səfəri çərçivəsində həmkarı Sergey Lavrovla görüş keçirib. Moskvada baş tutan görüş 5 saata yaxın davam edib. Görüş zamanı iki dövlət rəsmisi Suriya, Şimali Koreya, Ukrayna problemləri və iki dövlət arasında münasibətlərdən danışıblar. Danışıqlardan sonra isə jurnalistlər üçün mətbuat konfransı keçirilib.

Reks Tillerson Moskva səfərində diqqət çəkən məqamlardan biri də, bu idi ki, Rusiya prezidenti Vladimir Putinin jesti olub. Çünki əvvəlcədən bildirilmişdi ki, Putin Reks Tillersonu qəbul etməyəcək. Lakin nazirlərin görüşündən sonra, ölkə rəhbərliyi fikrini dəyişib. Putin Reks Tillersonu Kremldə qəbul edib. Ölkə rəhbəri həm Lavrov, həm də Tillersonla görüşüb.

Ziya Səccad
Ölkə.Az