Çingizlə birləşən gəncliyimiz və Ermənistana Qarabağ mesajı

Bu həftənin uğurlu idman tədbiri Qusar Olimpiya Kompleksində  Azərbaycan Milli Qəhrəmanı Çingiz Qurbanovun xatirəsinə həsr olunan turnirin keçirilməsi oldu. Turnir Azərbaycan Respublikası Gənclər və İdman Nazirliyi, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu, Azərbaycan Kikboksinq Federasiyası, Qusar Rayon İcra Hakimiyyəti və “Judo Club 2012” idman klubunun birgə təşkilatçılığı ilə baş tutdu.

Kikboksinq turnirinin qusarlıların yaddaşında dərin iz qoyduğunu desək yanılmarıq. Yarışın yüksək səviyyədə təşkili və keçirilməsi Çingizə olan sonsuz sevginin göstəricisi idi.  Yarış qəhrəmanımızın adına layiqli şəkildə baş tutdu. Dövlət himnizin səsləndirilməsi,  Azərbaycan əsgərlərinin möhtəşəm performansları, kikboksçuların uğurlu döyüşləri, üstəlik iştirakçıların davamlı alqışları tədbirə xüsusi rəng və coşqu qatırdı.

Tədbirdə geniş və ətraflı çıxış edən millət vəkili Adil Əliyev Çingizin nəinki Qusar, bütün Azərbaycanın igid övladı olduğunu qeyd etdi.

Millət vəkili çıxışında Milli Qəhrəman Çingiz Qurbanovun rəşadəti ilə bugünkü gənclərimizə əsl örnək olduğunu söylədi:

“Gənc nəsil onun kimi oğullardan nümunə götürməli, Ç.Qurbanovun xatirəsi əbədi yaşadılmalıdır. Peşəkar idmançıların güclərini sınayacağı kikboksinq yarışı da bu amala xidmət edir. Milli Qəhrəman Çingiz Qurbanov da vaxtilə kikboksinq idmanı ilə məşğul olub”.

Eyni zamanda  turnir Azərbaycan Kikboksinq Federasiyasının öz qəhrəman idmançısını unutmadığını göstərdi. Nəzərə almaq lazımdır ki, bu gün kikboksinq federasiyasının minlərlə üzvü var.  Onlar milli vətənpərvərlik ruhunda yetişirlər. Çingizin qəhrəmanlığı ölkədə gedən vətənpərvərlik prosesində federasiyanın  hansı rol oynadığını sübut etmiş oldu.

Həmçinin bu cür yüksək səviyyəli yarışın Qusarda keçirilməsinin ideoloji-siyasi və ictimai-sosial əhəmiyyəti də böyükdür.  Həm də tədbir Azərbaycanda yaşayan bütün azsaylı xalqların vahid azərbaycançılıq ideologiyası ətrafında sıx birləşdiyinin mesajı idi. Habelə turniri yüz illərlə formalaşan ortaq adət-ənənələrimiz və vahid dəyərlərimizin bir məxrəcdə hərəkətinin təzahüru adlandırmaq olar. Ən əsası isə işğal altında olan Qarabağın azərbaycançılıq ideologiyası ilə birləşən azsaylı xalqların da torpağı olduğu Ermənistana bir mesaj  idi.

Bu gün Azərbaycanın hər bir bölgəsi şəhid məzarları ilə əhatələnib. Onlar bizim qürur və qeyrət ocaqlarımızdır. Torpağı vətən edən onların axan qanlarıdır. Onların hər biri gənclərimiz üçün igidlik nümunəsidir. Qusarlılar  da Qarabağda gedən döyüşlərdə fəal iştirak edib, yüzlərlə qazi və 61 şəhid veriblər. Qusarlılar hər zaman onların əziz xatirəsini hörmətlə yad edirlər.

Elnur Eltürk
Fotolar: Mahir Hüseynbəyli
Ölkə.Az