Deputat: “Vətəndaş adi Xəzər dənizinin balığına belə həsrət qalıb”

“Ölkə.Az”-ın məlumatına görə, bu fikirləri Milli Məclisin bu gün keçirilən plenar iclasında Hesablama Palatasının hesabatının müzakirəsi zamanı deputat Fazil Mustafa bildirib. 

F.Mustafa deyib ki, Azərbaycan Beynəlxalq Bankında mənimsənilmiş böyük vəsaitlərin heç biri büdcəyə qaytarılmayıbsa, o zaman belə vəziyyətlə qane ola bilmərik:

“Sənəddə bu faktların sadəcə bir nöqsan olaraq göstərməyin nə mənası var? Bizi daha çox maraqlandıran nəticədir. Bəli, Azərbaycan reallıqlarında hər yerə rahatlıqla gedə bilməz. Amma dövlət vəsaitlərinin büdcəyə qaytarılması üçün daha ciddi addımla atılmalıdır”. 

F.Mustafa qida təhlükəsizliyi ilə bağlı da acınacaqlı vəziyyətin hökm sürdüyünü söyləyib:

“Son vaxtlar hər gün oxuyuruq ki, filan rayonda at kəsildi, eşşək kəsildi, it kəsildi. Həmin heyvanları kəsib lülə-kabab şəklində restoranlarda vətəndaşlara yedirirlər. Bunun başında hansı məmurun milyonlarla vəsait qazanması müqabilində baş verir. Yaxud, vətəndaş adi Xəzər dənizinin balığına belə həsrət qalıb. Mal-heyvanı, qaz-nefti başa düşdük. Bu balığa ki, ot, yem verilmir. Elə qiymət qoyurlar ki! Heç olmasa, bu ökədə yaşayan vətəndaş da o kürüdən bir qaşıq yeyə bilməlidir. Heç olmasa, bu sahədə qiymətlərə nəzarət etmək lazımdır”.

Zaur Əziz
Ölkə.Az