Tural Abbaslı: "İndiki rəhbərliyin partiyadaxili siyasətini bəyənmirəm, amma..."

"Müsavat" partiyasının məclis üzvü Tural Abbaslının partiyadan istefa verəcəyi ilə bağlı xəbərlər yayılıb.

Bununla bağlı Tural Abbaslı ilə əlaqə yaratdıq. O, Ölkə.az-a verdiyi açıqlamasında yayılan xəbərləri təkzib etdi.

Tural Abbaslı: "Qətiyyən o fikirdə deyiləm ki, partiyanı tərk edim. Buna əsas da yoxdur. Nəinki mən partiyadan gedim, partiyadan məni kiminsə çıxaracağına da inanmıram. Çünki, biz illərimizi bu partiyaya qoymuş insanlarıq.

Ümumiyyətlə istefaları düzgün addım hesab etmirəm. Partiyada bəyənmədiyimiz addımlarla mübarizə aparmaq əvəzinə, mövqeləri həmin insanlara təhvil verib getmək olmaz.

Partiyanın indiki idarəçiliyində çox nüanslar var. İndiki rəhbərliyin siyasi addımlarını, siyasi qərarlarını, partiya daxili münasibətlərini bəyənmirəm amma qətiyyən buna etiraz olaraq getmək fikrində deyiləm. Əksinə, çalışacam ki, sona qədər mübarizə aparım. Neqativ hesab etdiyim halların aradan qaldırılmasında iştirak edim, nəinki istefa verib gedim. Müsavatdan istefa vermək kimi bir fikrimiz yoxdur".

Səxavət Məmməd
Ölkə.az