İspaniya Kataloniya rəhbərini məhkəməyə verir

Artur Mas seçkilərdə iştirak etmək hüququndan məhrum edilə bilər.

Ölkə.Az Reuters agentliyinə istinadən xəbər verir ki, İspaniyanın dövlət prokuroru Kataloniyanın rəhbəri Artur Ması məhkəmənin qadağasını pozaraq regionun müstəqilliyi ilə əlaqədər seçkinin keçirilməsinə görə məhkəməyə verməyə hazırlaşır. Əgər məhkəmə təqdim olunan iddianın baxılmasına qərar verərsə, Artur Mas növbəti regional seçkilərdə iştirak etmək hüququndan məhrum ediləcək.

Xatırladaq ki, 9 noyabr tarixində Kataloniyada müstəqilliklə bağlı referendum keçirilmişdi. İspaniyanın Konstitusiya Məhkəməsi seçkiləri qanuna zidd hesab etsə də, simvolik sorğuda iştirak edənlərin 80 faizi bu vilayətin müstəqilliyini dəstəkləmişdi. Referendumda iştirak edənlər "Kataloniyanın dövlət olmasını istəyirsinizmi?” və "Əgər elədirsə, müstəqil dövlət olmasını istəyirsinizmi?” suallarına cavab vermişdilər. Sözügedən sorğuda yaşı 16-dan böyük olan bütün vilayət sakinləri qatılmışdılar. Qeyd edək ki, 2,25 milyon nəfərin qatıldığı seçkidə iştirakçıların cəmi 4,5 faizi Kataloniyanın müstəqilliyinin əleyhinə səs vermişdi.

Rəşid Mustafazadə

Ölkə.Az