İslamçıların lideri qətlə yetirildi

Yəməndə islamçıların lideri öldürülüb.

Ölkə.Az "Al-Arabia" agentliyinə istinadən xəbər verir ki, bu gün Yəmənin paytaxtından cənubda "Əl-İslah" adlı islampərəst partiyanın liderlərindən biri, Sadıq Mənsur qətlə yetirilib. İslamçıların lideri paytaxt Səna şəhərindən 200 km aralıda yerləşən Taizədə avtomobilinə quraşdırılmış partladıcı qurğunun işə düşməsi nəticəsində dünyasını dəyişib.

Hal-hazırda polis səlahiyyətliləri hadisə ilə bağlı araşdırmalar aparırlar. Qurğunun avtomobilə kim və hansı qüvvələr tərəfindən yerləşdirilməsi ilə bağlı hələlik heç bir məlumat yoxdur. İslamçıların ehtimallarına görə, bu hadisənin törədilməsində "Ənsar Allah" adlı əks hərəkatın şiə üsyançıları - husilərin əli var.

Mənsur Sadıq "Əl-İslah" partiyasının baş katibinin köməkçisi vəzifəsini icra edib və 2011-ci ildə 30 ildən çox Yəmən respublikasını idarə edən prezident Əli Abdalla Salehin getməsilə nəticələnən xalq hərəkatını dəstəkləyib. Son zamanlar o, ölkədə bir-biri ilə düşmənçilik edən müxtəlif hərbi-siyasi düşərgələrin barışdırılması prosesində vasitəçilik edirdi.

Qeyd edək ki, bu, cari ildə baş verən ikinci oxşar qətldir. 2 noyabrda Sənada tanınmış siyasi xadim və hüquq müdafiəçisi Məhəmməd Abdel əl-Mütəvəkkil güllələnmişdi. Öldürülən siyasətçi Abdalla Salehə müxalif olan "Əl-Likaa əl-Müştərək" adlı partiyalar koalisiyasının baş katibi olmuşdu.

Rəşid Mustafazadə

Ölkə.Az