Fuad Ələsgərovun sözlərinə QHT-lərdən cavab gəldi

"Azərbaycanda fəaliyyət göstərən qeyri-hökumət təşkilatlarının hamısının fəaliyyəti şəffaf deyildir"

Azərbaycan Respublikası Prezidenti Administrasiyasının Hüquq mühafizə orqanları ilə iş şöbəsinin müdiri, 1-ci dərəcəli dövlət müşaviri Fuad Ələsgərov deyib.

Bu sözlərlə bağlı Ölkə.az-a Qarabağ Azadlıq Təşkilatının sədri Akif Nağı və Beynəlxalq Münasibətlərin Araşdırılması Mərkəzinin (BMAM) sədri Rufiz Qonaqov açıqlama verib.

Akif Nağı: "Bizim QHT-də hər şey şəffafdır. Fuad Ələsgərov hansı QHT-ləri nəzərdə tutur adlarını çəksin. Ola bilər ki, Fuad Ələsgərov xaricdən, Avropadan, Rusiyadan qrant alanları deyir. Deyə bilmərəm onlar nə dərəcədə şəffafdır. Doğurdan da onlar haqqında müəyyən məlumatlar ortaya çıxır ki, 400-500 min avro qrant alıblar. O pulları necə xərcləyiblər, hansı layihələr həyata keçiriblər bu bardə məlumat yaymırlar. Fuad Ələsgərovun dediyində əslinə qalsa həqiqət var. Şəffaflıq gözlənilməlidir. Müəyyən bir mexanizim düşünülməlidir ki, onlar hesabat versinlər. Şəffaflığın olması üçün qanunlar qəbul edilməlidir. Ölkə daxilindən qrant alan QHT-lər açıq şəkildə hesabat verir.”

Rufiz Qonaqov: "Fikrimcə Fuad Ələsgərov Azərbaycandakı QHT-ləri yox, bu gün əsasən beynalxalq donorlardan maliyələşən QHT-ləri nəzərdə tutur. Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyələşdirdiyi QHT-lərin fəaliyyəti tam şəffaf şəkildə aparılır, dövlətin nəzarəti daim var. Azərbaycan maliyə alan QHT-lər hesabtlarını verirlər. Burada yəqin ki, beynəlxalq donorların gizli şəkildə QHT-lərə ayırdığı maliyyə üçün hesabat verməyən QHT-lərdən söhbət gedir. Ancaq bu cür QHT-lər azlıq təşkil edir. Azərbaycanda 3 mindən artıq QHT var, onların çoxu dövlətlə partnyorluq edir. Bu cür QHT-lərin hesabatlarla bağlı heç bir problemi olmur".

Səxavət Məmməd
Ölkə.az